प्रधानन्यायाधीश चोलेन्द्रशमशेर राणाविरुद्ध संसदमा पेश गरिएको महाभियोग प्रस्तावविरुद्धको रिट आज संवैधानिक इजलासमा पेशी तोकिएको भए पनि हेर्न नभ्याइनेमा परेकाले सुनवाइ भएन । 

कायममुकायम प्रधानन्यायाधीश दीपककुमार कार्कीको नेतृत्वमा न्यायाधीशहरू हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडा र डा. आनन्दमोहन भट्टराईसहितको संवैधानिक इजलासमा आज प्रारम्भिक सुनुवाइका लागि पेशी तोकिएको थियो । तर, हेर्न नभ्याइनेमा परेकाले मुद्दाको प्रारम्भिक सुनुवाइ हुन पाएन ।  रिट दर्ता भएको झन्डै डेढ महिनापछि उक्त मुद्दाको सुनुवाइको पालो आएको थियो । 

अधिवक्ताहरू डा. पुण्यप्रसाद खतिवडा र दीपकविक्रम मिश्रले  महाभियोग प्रस्तावविरुद्ध अन्तरिम आदेश जारी गर्दै बदर गराई पाउँ भन्दै  फागुन ११ गते दर्ता गराएको रिटमा प्रारम्भिक सुनुवाइका लागि पेशी तोकिएको थियो ।

गत फागुन १ गते प्रतिनिधि सभामा नेपाली कांग्रेस, नेकपा माओवादी केन्द्र, नेकपा एकीकृत समाजवादीका ९८ जना सांसदहरूले प्रधानन्यायाधीश राणाविरुद्ध महाभियोगको प्रस्ताव दर्ता गराएका थिए । 

उक्त प्रस्ताव दर्ता भएपछि संघीय संसद सचिवालयले सूचना समेत प्रकाशित गरेको थियो । 

महाभियोग प्रस्ताव दर्ता भएकै दिनदेखि राणा निलम्बनमा छन् । उनको ठाउँमा कायममुकायम प्रधानन्यायाधीश दीपककुमार कार्कीले सर्वोच्च अदालतको नेतृत्व गरिरहेका छन् ।