नेकपा एमालेको धरान उपमहानगरपालिका कमिटीले मेयरमा झण्डै एक दर्जन र उपमेयरमा आधा दर्जनको नाम सिफारिस गरेको छ । मेयरमा ११ जना र उपमेयरमा ६ जनाको नाम सिफारीस गरिएको हो । 

मेयर सिफारिसको पहिलो नम्बरमा हाल उपमेयर रहेकी मञ्जु भण्डारीको नाम छ भने पूर्वमेयर मनोजकुमार मेन्याङ्बोको नाम दोस्रोमा छ । 

यस्तै विजय राई, प्रकाश राई, मोतिराज सुनुवार, दोर्पध्वज राई, किशोरकुमार कार्की, मीन सुब्बा, नारायण सुवेदी, राजमणि निरौला र तीर्थ मास्केको नाम मेयरको उम्मेदवारका लागि सिफारिस गरिएको एमाले धरान अध्यक्ष हर्कजंग एभेङले जानकारी दिए । 

उनका अनुसार एक केन्द्रीय सदस्य, सात जना प्रदेश समिति सदस्य, तीन जिल्ला सदस्य तथा एक जना पूर्वजिल्ला सदस्यको नाम मेयर उम्मेदवारका लागि सिफारिस भएको हो । 

उपमेयरमा सुशीला पहाडी, लहरु जिमी, पदम इस्वो लिम्बू, इन्द्रकला राई, सविता चाम्लिङ र लीला राईको नाम सिफारिस गरिएको छ । 

१० बुँदेवालाको राम्रो प्रभाव मानिएको धरानमा मेयरमा ओलीनिकट मञ्जु भण्डारी र उपमेयरमा १० बुँदेतर्फका तर्फबाट पदम इस्बो लिम्बुलाई उपमेयर दिने सम्भावना रहेको एमालेका नेताहरू बताउँछन् । 

धरान उपमहानगरपालिकामा २०७४ को निर्वाचनमा नेकपा एमालेबाट प्रमुखमा तारा सुब्बा र उपप्रमुखमा मन्जु भण्डारी विजयी भएका थिए । 

प्रमुखमा जितेका सुब्बाले त्यसबेला २० हजार ९७५ मत ल्याएका थिए । उनका निकटतम प्रतिस्पर्धी बनेका कांग्रेसका तिलक राईले १६ हजार १०२ र तेस्रो स्थानमा माओवादी केन्द्रका अइन्द्रविक्रम बेघाले ११ हजार १८० मत ल्याएका थिए ।

प्रमुख सुब्बाको निधन भएपछि खाली भएको उपनिर्वाचनमा भने कांग्रेसका तिलक राईले तत्कालीन नेकपाका प्रकाश राईलाई हराएका थिए । राईलाई झण्डै ३ हजार मतले पराजित गरेका थिए । 

उपनिर्वाचनमा तिलक राईले २६ हजार ७०९ मत ल्याउँदा नेकपाका उम्मेदवार प्रकाश राईले २३ हजार ९१४ मत पाएका थिए ।

धरानको २० वडामध्ये एमाले एक्लैले १४ वटा जितेको थियो भने कांग्रेसले ५ वटा र माओवादी केन्द्रले १ वडा जित्न सफल भएको थियो ।