शनिवार २ वर्ष यताकै सर्वाधिक बढी विदेशीहरू नेपाल आएका छन् । 

अध्यागमन विभागका अनुसार, विगत २ वर्ष यताकै सर्वाधिक बढी २ हजार ५ सय ९३ विदेशी नागरिक एकैदिन नेपाल आएका हुन्  ।

विभागका महानिर्देशक नारायण भट्टराईले यो संख्या २०१९ यताकै सबैभन्दा धेरै भएको जानकारी दिए । 

कोरोना महामारीका कारण सुस्ताएको नेपालको पर्यटन क्षेत्रले विस्तारै गति लिन थाल्दा पर्यटकहरू नेपाल आउनेक्रम बढेको हो ।

भट्टराईका अनुसार, अप्रिल १० सम्ममा नेपालमा सरदर २ हजार विदेशी आएको देखिन्छ ।

अप्रिल महिनामा १९ हजार ५ सय ९२ विदेशी नेपाल आएका छन् । जसमध्ये सरदर २ हजारको संख्यामा विदेशी नागरिक नेपाल आएको महानिर्देशक भट्टराईले जानकारी दिए । 

२०२२ शुरू भएयता ९८ हजार ६ सय ४ जना विदेशी नागरिक नेपाल आएका छन् । 

जनवरी १ देखि अप्रिल १० सम्ममा करिब एक लाख नागरिक नेपाल आउनु सुखद् भएको महानिर्देशक भट्टराई बताउँछन् । 

उनले भने,‘कोभिडले आक्रान्त पारेको पर्यटन क्षेत्र विस्तारै चलमलाउँदै छन् भन्ने यस तथ्यांकले देखाउँछ, यो सुखद् कुरा हो ।’

विभागका अनुसार एयरलायन्समार्फत नेपाल आउने विदेशी नागरिकहरूमा भारतका नागरिकहरू सर्वाधिक बढी छन् । 

यसपछि अमेरिका, युके, अष्ट्रेलिया, बंगलादेश, जर्मनी, फ्रान्स, क्यानडा, स्पेन, नेदरल्याण्डबाट बढीमात्रामा पर्यटकहरू नेपाल आएका छन् ।

यस्तै नेपालमा बढी पर्यटक आउने देशहरूको सूचीमा चीन ११ औं नम्बरमा रहेको विभागले जनाएको छ । 

सहज नीतिले बढायो उत्साह

कोरोना महामारीका समयमा विभिन्न नीतिका कारण सुस्ताएको पर्यटन क्षेत्र नीतिमा सहजतासँगै पुनः चलमलाएका छन् ।

अहिले सरकारले विदेशबाट आउने नागरिकलाई कोभिड खोप लगाएको अवस्थामा पीसीआर परीक्षण गर्नुनपर्ने व्यवस्था गरेको छ ।

यस्तै उनीहरूलाई क्वारेन्टीनमा समेत बस्नु नपर्ने व्यवस्था गरेसँगै पछिल्ला दिनहरूमा पर्यटक आवागमनको संख्या बढेको अध्यागमन विभागका महानिर्देशक भट्टराई बताउँछन् । 

उनले भने,‘अहिले विदेशीहरू नेपाल आउने क्रममा नीतिनियममा समेत सहजीकरण भएपछि पर्यटकको संख्या बढेको देखिन्छ ।’

दैनिक ५० समूहलाई ट्रेकिङ अनुमति

अध्यागमन विभागले पछिल्ला दिनहरूमा ट्रेकिङमा आउने पर्यटकको संख्या उत्साहजनक रहेको जनाएको छ ।

महानिर्देशक भट्टाईका अनुसार पछिल्ला दिनहरूमा दैनिक करिब ५० समूहले ट्रेकिङको इजाजत पाउने गरेका छन् । 

यस्तै हिमाल आरोहणमा आउनेहरूको संख्या भने आशातित रूपमा नबढेको उनले बताए ।