विवेकशील साझा पार्टीले काठमाडौं महानगरपालिकाको मेयर र उपमेयरको उम्मेदवारका लागि दुई महिलालाई अघि सार्ने भएको छ । समीक्षा बास्कोटालाई मेयर र कीर्ति तुलाधरलाई उपमेयरको उम्मेदवार बनाउने विवेकशील साझाले सोमवार निर्णय गरेको हो ।

बास्कोटा पार्टीको बागमती प्रदेशकी पूर्व संयोजक तथा हाल पार्टीको केन्द्रीय कार्य सम्पादन समितिकी सदस्य हुन् । ३८ वर्षीय बास्कोटाले काठमाडौं स्कुल अफ लबाट कानूनमा स्नातक गरेर अमेरिकाबाट कानूनमै स्नातकोत्तर गरेकी छन् । 

उनी गत निर्वाचनमा काठमाडौं क्षेत्र नं १ ‘क’ बाट प्रदेश सभाको उमेदवारसमेत बनेकी थिइन्।  उनले २७ प्रतिशत मत ल्याएर तेस्रो स्थान हासिल गरेकी थिइन् ।

तुलाधर पार्टीकी केन्द्रीय सदस्य हुन् । उनी नेपाल जेसीजको आजसम्मका तीनजना महिला राष्ट्रिय अध्यक्ष मध्येकी एक हुन् । उनी अन्तर्राष्ट्रिय जेसीजको पनि दक्षिण एशियाबाटै पहिलो महिला उपाध्यक्ष हुन् । शिक्षा विषयमा स्नातकोत्तर गरेकी ६२ वर्षीय तुलाधर हाल विभिन्न संघ-संगठनको नेतृत्वदायी भूमिकामा रहेको विवेकशील साझाले जनाएको छ । 

विवेकशील साझाका अनुसार दुवै उम्मेदवारले आफ्नो संयुक्त घोषणापत्र छिटै पत्रकार सम्मेलनमार्फत् सार्वजनिक गर्नेछन् । 

 भ्रष्टाचार नियन्त्रण, सुशासन र सेवाप्रवाह, सुलभ, व्यवस्थित, विद्युतीय यातायात, नेवा: कला-संस्कृतिको सम्वर्द्धन र पुनर्जागरण,  खुला क्षेत्रको संरक्षण र विस्तार, नदी-नालाको सफाइ र पुनर्स्थापना ,सफा र व्यवस्थित काठमाडौं,  गुणस्तरीय शिक्षा, स्वास्थ्य र सामाजिक सुरक्षालगायत विषयहरू घोषणापत्रमा समेटिने पार्टीले जनाएको छ । 

'विश्वकै विशिष्ट पहिचान बोकेको काठमाडौं पछिल्ला दशकहरूमा क्रमिकरूपले ध्वस्त भएको परिप्रेक्ष्यमा महानगरपालिकालाई दुईजना इमानदार, सक्षम, परिपक्व र परिवर्तनका लागि प्रतिबद्ध महिलालाई जिम्मा लगाउन सकेको खण्डमा, देशको मुहार परिवर्तनको शुरूवात हुने विश्वास लिएको छु,' पार्टी अध्यक्ष रवीन्द्र मिश्रले भने ।