पाँच दलीय गठबन्धनले स्थानीय तहको चुनावी तालमेलको मोडालिटीबारे छलफल गर्न मंगलवार दिउँसो ४ बजे बैठक बोलाएको छ । 

सोमवार बिहान प्रधानमन्त्री निवास बालुवाटारमा बसेको गठबन्धनको बैठकले स्थानीय तह निर्वाचनमा देशैभर ठाउँ र अवस्थाअनुसार इमान्दारीपूर्वक तालमेल गर्न आग्रह गर्दै संयुक्त विज्ञप्ति प्रकाशन गरेको छ । 

‘मंगलवार ४ बजे फेरि गठबन्धनको बैठक बसेर चुनावी तालमेलका लागि कस्तो मेकानिजम् अपनाउने भन्नेबारे छलफल गर्छौं,’ कांग्रेसका नेता तथा सरकारका प्रवक्ता ज्ञानेन्द्रबहादुर कार्कीले भने ।

पाँच दलीय गठबन्धनका नेताहरूले स्थानीय चुनावमा इमान्दारिताका साथ तालमेल गर्न आफ्ना कार्यकर्तालाई आग्रह गरेका छन् । 

स्थानीय तहको सिट बाँडफाँट कसरी गर्ने भन्नेबारे भने गठबन्धनभित्र कुरा मिलिसकेको छैन । 

‘देशैभर ठाउँ र अवस्थाअनुसार चुनावी तालमेल मिलाएर चुनावमा आपसी सहकार्य र परस्पर सहयोगको भावनाले अगाडि बढ्न पाँच दलका सम्पूर्ण साथीहरूलाई आह्वान गर्दछौं,’ गठबन्धनले संयुक्त रुपमा आज जारी गरेको विज्ञप्तिमा उल्लेख छ ।