रुसका पूर्व राष्ट्रपति दिमित्री मेदभेदेभले स्विडेन र फिनल्यान्ड अमेरिकी नेतृत्वको सैन्य गठबन्धन नेटोमा जोडिएमा रुसले आफ्नो सुरक्षाका लागि आणविक हतियार समेत तैनाथ गर्न तयार रहेको बताएका छन् ।  

रुससँग १३ सय किलोमिटर सीमा जोडिएको फिनल्यान्डले केही हप्ताभित्र नेटोमा जोडिने विषयमा निर्णय लिने त्यहाँकी प्रधानमन्त्री सान्ना मरिनले बताएकी छन् । 

रुसको सुरक्षा परिषद्का उपाध्यक्ष मेदभेदेभले स्विडेन र फिनल्यान्ड नेटोमा जोडिएमा रुसले बाल्टिक समुद्रमा सैन्य सन्तुलन कायम गर्नका लागि स्थल, जल र वायुसेनालाई बलियो बनाउनुपर्ने बताए । 

पोल्यान्ड र लिथुएनियाको बीचमा रहेको रुसी भूमि कालिनिनग्रादमा रुसले आणविक हतियार तैनाथ गर्न सक्ने सम्भावना दर्साएको हो । 

‘बाल्टिकमा आणविक हतियार नराख्ने कुरा गर्न मिल्दैन, सन्तुलन पुनर्बहाली गर्नैपर्ने हुन्छ,’ मेदभेदेभले बताए । ‘अहिलेसम्म रुसले त्यस्तो योजना बनाएको थिएन । तर हामीलाई बाध्य बनाइयो भने ध्यान दिनुस् यसको प्रस्ताव हामीले गरेका थिएनौं ।’