वैशाख ३० गते हुने स्थानीय तह निर्वाचनका लागि नेकपा एमालेबाट काठमाडौं महानगरपालिकाको मेयरको उम्मेदवारका लागि ५ जनाको नाम सिफारिश भएको छ ।

महानगर कमिटीको बैठकले उम्मेदवारका लागि ५ जनाको नाम सिफारिश गरेको हो । 

एमालेले अहिलेका मेयर विद्यासुन्दर शाक्य, बागमती प्रदेश सभाका सांसद केशव स्थापित, एमाले महानगर कमिटीका अध्यक्ष निर्मल देउला, रामवीर मानन्धर, इन्दिरा पन्तको नाम जिल्ला कमिटीमा पठाएको छ ।

जिल्ला कमिटीले प्रदेश कमिटीलाई सिफारिश गर्दै नाम केन्द्रमा पुग्नेछ । एमालेले महानगर र उपमहानगरको उम्मेदवार केन्द्रबाटै टुंगो लगाउने यसअघि नै निर्णय गरिसकेको छ ।  

उपमेयरका लागि रत्ना गुरुङ, पेम्बा लामा, निमा काफ्ले र शान्ति अधिकारीको नाम सिफारिश भएको छ । गुरुङ र अधिकारी पहिलो संविधान सभाका सदस्य थिए ।

एमालेले हालसम्म चितवनको भरतपुर महानगरमा विजय सुवेदी र वीरगञ्ज महानगरका लागि विजय सरावगीको नाम सिफारिश गरिसकेको छ । पोखरामा उम्मेदवार छान्न भोलि मतदान हुँदैछ भने विराटनगरको पनि अझै टुंगो लागेको छैन ।

ललितपुरमा हरिकृष्ण व्याञ्जनकार नै उम्मेदवार बन्ने लगभग टुंगो लागेको छ ।