नेकपा (माओवादी केन्द्र) दाङका इन्चार्ज जीवन गौतमले चुनावको मुखमा पार्टी परित्याग गरेका छन् । 

सोमवार दाङमा पत्रकार सम्मेलन गरी पार्टी त्याग गरेको घोषणा गरेका हुन् । 

उनी २०६५ मा एकता केन्द्र मसालबाट माओवादीमा आबद्ध भएका थिए । 

माओवादी केन्द्रको केन्द्रीय सदस्यसमेत रहेका गौतम घोराही उपमहानगरपालिकाको मेयरको दाबेदार थिए । 

पार्टी परित्याग गरेपछि लोकान्तरसँग प्रतिक्रिया दिँदै गौतमले भने, 'पार्टीमा गुटबन्दी, सिन्डिकेट, निषेधको प्रवृत्ति देखेर पार्टी छाडेँ । अब केही समय म कुनै पनि पार्टीमा लाग्दिनँ ।' 

मेयरको टिकट नपाउने देखिएपछि पार्टी छाड्नुभएको हो ? भन्ने प्रश्नमा गौतमले भने, ‘त्यो गलत कुरा हो । अझै टिकटको बाँडफाँट नै भएको छैन । अनि कसरी टिकट नपाएर पार्टी छाड्यो भन्ने कुरा हुन्छ ?’

उनले माओवादीले एमसीसी पास गरेपछि आफ्नो अस्तित्व समाप्त समेत गरेको बताए ।