काठमाडौं उपत्यका अपराध अनुसन्धान कार्यालयले पछिल्लो ३ महिनामा नक्कली मह बनाउने कारखानामा छापादेखि चिकित्सा क्षेत्र आयोगको परीक्षामा सहभागी नक्कली परीक्षार्थीलाई पक्राउ गर्नेसम्मका काम गरेको छ ।

कार्यालयका प्रमुख एसएसपी वसन्त कुँवरका अनुसार यस अवधिमा १०५ जनालाई पक्राउ गरिएको छ । जसमा बैकिङ कसूर, ठगी, चोरी, सट्टेबाजी, कालोबजारी वैदेशिक रोजगारी ठगी लगायतमा ७३ वटा मुद्दा दर्ता गरिएको छ ।

पछिल्लो समयमा महाशाखामा अनलाइन ठगीका उजुरीहरू धेरै आइरहेका छन् । अरूको मोबाइल नम्बर प्रयोग गरेर बैंकको पैसा हिनामिना गरेको उजुरीहरू आउने गरेको कार्यालयले जनाएको छ ।

कार्यालयले पछिल्लो ३ महिनामा गरेका मुख्य काम

२०७८ पुस ३ गते कैलालीको जानकी गाउँपालिका–९ का १९ वर्षीय अर्जुन दासको विभत्स हत्या गरेर फरार भएका अपराधीलाई खोज्न कैलाली प्रहरीलाई फलामको चिउरा चपाउनु जस्तै भएको थियो ।

अपराधीहरू हत्या गरेर भारतमा फरार भएका थिए । उनीहरूले सामाजिक सञ्जाल फेसबूकमार्फत आफूहरूलाई कसैले समाउन नसक्ने भन्दै धम्की दिएपछि प्रहरीलाई झन् चुनौती थपिएको थियो । 

काठमाडौं उपत्यका अपराध अनुसन्धान कार्यालयले प्रहरी प्रधान कार्यालयको समन्वयमा ४ जनालाई पक्राउ गरी शुक्रवार सार्वजनिक गरेको थियो । पक्राउ पर्नेमा जानकी गाउँपालिका–९ का १९ वर्षीय सुमित साउद, बमे भन्ने बमबहादुर बोहेरा, रोनी परियार भन्ने दिलिप दास र मनोज भण्डारी छन् ।

गत पुस ३ गते जानकी–९ को अमरावती सामुदायिक जंगलमा सोही ठाउँका २५ वर्षी अर्जुन दासको घाँटी छिनालेर हत्या गरिएको अवस्थामा शव फेला परेको थियो । अर्जुनलाई मोबाइल चोरेको आरोपमा कुटपिट गर्दै रुखमा बाँधेर विभत्स हत्या गरिएको प्रहरीले जनाएको थियो । 

आरोपीहरूलाई बिहीवार अपराध महाशाखाबाट खटिएको विशेष अनुसन्धान टोलीले रुपन्देहीको बेलहिया सीमानाकाबाट पक्राउ गरेको थियो ।

...

यस्तै गत चैत २० गते चिकित्सा शिक्षा आयोगद्वारा सञ्चालित ‘एमबीबीएस इन्ट्रान्स’मा सहभागी ४ नक्कली परीक्षार्थीसहित ५ जनालाई अपराध अनुसन्धान कार्यालयको टोलीले पक्राउ गरेको थियो ।

चैत १८ गते सञ्चालन भएको ‘मेडिकल एजुकेसन कमन इन्ट्रान्स’मा अर्कैको नाममा परीक्षा दिन पुगेका पर्नेमा महोत्तरीको साविक सम्सी– ४ घर भएका २२ वर्षीय अमर पण्डित, चक्रघट्टा–४ सर्लाही घर भएका २२ वर्षीय अनिकेत चौधरी, राजगढ–१ सप्तरी घर भएका २६ वर्षीय राम आशिष यादव, भारतको बिहार घर भएका २४ वर्षीय इस्तियाक अहमद र सम्सी ९ ५ महोत्तरी घर भएका २३ वर्षीय सन्नीकुमार साह पक्राउ गरेका थिए । 

काठमाडौंको सीसीआरसी कलेज, एम्बिसन कलेज र ग्रामर स्कूल परीक्षा केन्द्रबाट अघिल्लो शुक्रवार पक्राउ गरिएका उनीहरूलाई आइतवार सार्वजनिक गरिएको थियो । परीक्षामा नक्कली परीक्षार्थीले समावेश हुने गरेको गुनासो समय–समयमा आएता पनि यसभन्दा अगाडि प्रहरीले अपरेसन चलाउन सकेको थिएन ।

...

माघ १६ गते  कार्यालयले २९६ कार्टुन रक्सीसहित ४ जनालाई पक्राउ गरेको गरेको थियो ।

पर्साका ३९ वर्षीय सन्तोषचन्द्र बख्रेल, काठमाडौंको कागेश्वरी मनोहरा नगरपालिका ६ का ३० वर्षीय शैलेश पन्त, पर्सा सुवर्णपुरका २८ वर्षीय रविन पाख्रिन र सर्लाही बरहथवा नगरपालिकाका ३८ वर्षीय नारायणप्रसाद घिमिरेलाई पक्राउ गरेको थियो । 

उनीहरूले आन्तरिक राजस्वको अन्तःशुल्क नटाँसिएको अर्थात् राजश्व छली गरेको रक्सी बजारमा बिक्री गर्दै आएको सूचनाका आधारमा पक्राउ गरेको थियो ।

प्रहरीले रेड लेबल, ब्ल्याक लेबल, एब्सुलेट भोड्का र चिभास रेगल बरामद गरेको थियो । फागुन २२ गते एक करोड ५० लाख हुन्डी रकमसहित २ जना पक्राउ परेका छन् । काठमाडौंको कालिमाटीबाट अमित अग्रवाल र बिक्की खड्गीलाई पक्राउ गरेको उनीहरूले नक्कली गरगहनाको कारोबार गरेको समेत खुलेको प्रहरीले जनाएको थियो ।

माघ ७  गते काठमाडौंका विभिन्न ठाउँमा गुणस्तरहीन मह उत्पादन तथा बिक्री वितरण गरेको अरोपमा काठमाडौं– २७ ज्याठाका ३८ वर्षीय नरबहादुर श्रेष्ठलाई प्रहरीले मह उत्पादन गर्ने ठाउँबाट ७ हजार ६ सय तयारी तथा कच्चा महसहित पक्राउ गरेको थियो ।

सात वर्ष अगाडिदेखि श्रीमती रस्मिलाको नाममा ‘नतिजा प्याकेजिङ’ नामको कम्पनी सञ्चालन गरी मह बिक्री वितरण गर्दै आएको खुलासा भएको थियो ।

प्रहरीले त्यस्तो मह काठमाडौं, भक्तपुर र पोखराका होटल तथा रेष्टुरेन्टहरूमा थोक तथा खुद्रा बिक्री गर्ने गरेको खुलेको थियो । श्रेष्ठले मह बनाउँदा ३० प्रतिशत ग्लुकोज, ३० प्रतिशत चिनी र ४० प्रतिशत मह बनाउन प्रयोग हुने कच्चापदार्थ मिसावट गर्ने गरेको खुलेको थियो ।

श्रेष्ठको पसलबाट ६०० किलो तयारी मह, ६ हजार ५ सय किलो कच्चा र गुणस्तरहीन मह, ग्लुकोज ५ सय किलो, चिनी एक सय किलो, जोख्ने मेसिन, सिल मेसिनलगायत बरामद भएको थियो ।

यसका अलवा भन्सार छली गरेर ल्याएको ७ वटा रोयल इन्फिलिट मोटरसाइकल बरामद, कस्तुरीको बिना र भालुको पित्तको कारोवार गर्ने ३ जनालाई पक्राउ गर्ने लगायतका काम गरेको छ । 

यसका साथै कोरोना भाइरसको नक्कली पीसीआर परीक्षण रिपोर्ट बनाउने ल्याब सञ्चालकलाई समेत यस अवधिमा पक्राउ गरिएको छ ।