नेपाली कांग्रेसका केन्द्रीय सदस्य तथा गृहमन्त्री बालकृष्ण खाँणले गठबन्धन बाहिर जानेलाई कारबाही हुने बताएका छन् ।

खाँणले गठबन्धनको निर्णयविरुद्ध लाग्नेहरूलाई पार्टीले कारबाही गर्ने चेतावनी दिए ।

रुपन्देही तिलोत्तमास्थित आफ्नै घरमा पत्रकारसँग कुरा गर्दै उनले सर्वोच्चको आदेशपछि राजनीतिक दलहरू मिलेर गठबन्धन सरकार बनेको भन्दै उनले गठबन्धनप्रति कांग्रेस प्रतिबद्ध रहेको बताए ।

गठबन्धन दलहरूबीच सहमति, सहकार्य गर्ने अठोट नेपाली कांग्रेससँग भएको भन्दै गठबन्धनको कार्यान्वयनको नेपाली कांग्रेसले गर्ने उनले बताए ।

खाँणले वैशाख ३० गते नै स्थानीय तहको निर्वाचन हुँदैन कि भन्ने आशंका भए पनि निर्धारित मितिमै निर्वाचन हुने बताए । निर्वाचन आयोगले पूर्ण तयारीका साथ अधिकृत र कर्मचारीलाई काममा खटाउनुका साथै मतपत्र छाप्ने काम धमाधम भएकाले स्थानीय तह निर्वाचन तोकिएकै मितिमा हुने उनले बताए ।

निर्वाचनमा सहभागी नभएका दलहरूसँग स्थानीय तहको निर्वाचनमा भाग लिन सरकारले आह्वान समेत गरेको भन्दै उनले केही दलसँग सरकार बारम्बार छलफलमा रहेको बताए । राजनीतिक असहमति भए पनि जनताका अधिकार सुनिश्चित गर्न दलहरूलाई निर्वाचनमा भाग लिन आह्वान गरेको र त्यही क्रममा नेत्रविक्रम चन्द ‘विप्लव’ र सीके राउतसँग पनि छलफल भइरहेको उनले बताए ।

खाँणले निर्वाचनलाई निष्पक्ष, स्वतन्त्र र भयरहित बनाउन शान्ति सुरक्षामा गृह मन्त्रालयले कुनै कसर बाँकी नराख्ने बताए । यसअघिका निर्वाचन चरणबद्ध गर्दा सुरक्षाका दृृष्टिकोणले केही सहज भए पनि यसपटक एकै पटकमा निर्वाचनमा गर्दा सुरक्षा चुनौती पनि बढेकाले आवश्यक परे नेपाल आर्मी, निजी क्षेत्रका हेलिकप्टरबाट हवाई गस्ती गर्ने र आवश्यक सुरक्षा चाहिने स्थानमा सशस्त्रलाई पठाउने तयारी भएको उनले बताए ।

खाँणले राष्ट्र बैंकका गभर्नर महाप्रसाद अधिकारीलाई सर्वोच्चले पुनर्बहाली गरेको निर्णयलाई स्वीकार गर्ने समेत बताए । अर्थमन्त्रीको प्रस्तावमा मन्त्रिपरिषद्बाट हटाउने निर्णय भएको र त्यसको जिम्मा सिंगो मन्त्रिपरिषद्ले लिने भन्दै उनले न्यायालयको निर्णयलाई सम्मान गर्ने बताए ।