स्थानीय तह निर्वाचन २०७९ अन्तर्गत रसुवाको गोसाइँकुण्ड गाउँपालिकामा दुई महिला वडा सदस्य निर्विरोध निर्वाचित भएका छन् ।

उक्त गाउँपालिका–२ र ५ मा दलित महिला सदस्यतर्फ एक/एक जनाको मात्र उम्मेदवारी परेकाले उनीहरू निर्विरोध निर्वाचित भएको प्रमुख निर्वाचन अधिकृत राजेन्द्र नेपालले जानकारी दिए ।

निर्विरोध निर्वाचित हुनेमा नेपाली कांग्रेसबाट वडा-२ का लक्ष्मी परियार तथा नेकपा एमालेबाट वडा-५ का कान्छी लाटी कमिनी रहेको बताइएको छ । उनीहरूको निर्विरोध घोषणा स्थानीय तह निर्वाचन कानूनबमोजिम हुने मुख्य निर्वाचन अधिकृतको कार्यालयले जनाएको छ । 

स्थानीय तह निर्वाचनअन्तर्गत सोमवार भएको मनोनयन दर्ताका क्रममा नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, राप्रपा, राप्रपा नेपाल, मंगोल अर्गनाइजेशन दल एवं स्वतन्त्र उम्मेदवारसमेत रहेका छन् । 

पाँचवटा गाउँपालिका र २७ वटा वडा रहेको रसुवा जिल्लामा गाउँपालिका अध्यक्ष, उपाध्यक्ष, वडाध्यक्ष तथा सदस्य पदका लागि कूल ५०३ जनाले उम्मेदवारी दर्ता गराएको प्रमुख निर्वाचन अधिकृतको कार्यालयले जनाएको छ ।