गृहमन्त्री बालकृष्ण खाणले एमसीसीमार्फत् अमेरिका बम, बारुद र सेना लिएर आए कांग्रेस अग्रपंक्तिमा रहेर लड्न बताएका छन् । 

बुधवार नेपाल तरुण दलले आयोजना गरेको भेलालाई सम्बोधन गर्दै गृहमन्त्री खाणले यस्तो बताएका हुन् । 

उनले एमसीसी प्रस्ताव पास हुनु नेपालकै लागि ज्यादै ऐतिहासिक र महत्त्वपूर्ण कार्य भएको उल्लेख गर्दै यस परियोजनाले नेपालमा गरिबी निवारण र नेपालमा रोजगारी अभिवृद्धि हुने बताए । 

उनले कतिपयले एमसीसी पास गरेपछि अमेरिकाबाट सेना र बम बारुद आउँछ भन्ने भ्रम छरिरहेको उल्लेख गर्दै बिजुलीको तारबाट बम बारुद र सेना नआउने जिकिर गरे । 

गृहमन्त्री खाणले पूर्ववर्ती सरकारले करिव ४ वर्षसम्म एमसीसी परियोजनालाई अनिर्णयको बन्दी बनाएर नेपालको भौतिक विकासमा अवरोध सिर्जना गरेको आरोपसमेत लगाए । उनले एमसीसी परियोजनाबाट बम, बारुद र सेना आए नेपाली कांग्रेस अग्रपंक्तिमा रहेर लड्ने बताए । 

‘जुन टावरबाट, बिजुलीको लाइनबाट बिजुली आउँछ, कुनै पनि बिजुली लाइनबाट दुनियाँमा कहीँ पनि सेना आएको छैन । बन्दुक र बारुद आएको छैन,’ उनले भने, ‘त्यसकारण बन्दुक र बारुद आउँछ भन्ने साथीहरुले बुझ्नुहोस्, बिजुलीको तारबाट बिजुली नै आउँछ । कुनै पनि बहानामा नेपालमा सेना आयो भने सबैभन्दा पहिला हामी लड्नेछौँ । नेपाली कांग्रेस त्यो हस्तक्षेपको विरुद्धमा लड्नेछ ।’