नेपाल राष्ट्र बैंकका गभर्नर महाप्रसाद अधिकारीले अर्थतन्त्रको बाह्य क्षेत्र केही दबाबमा रहेको बताएका छन् ।

बुधवार नेपाल राष्ट्रबैंकको ६७औं वार्षिकोत्सव कार्यक्रममा बोल्दै गभर्नर अधिकारीले पछिल्लो समय अर्थतन्त्रको बाह्य क्षेत्रमा केही दबाब रहेको बताए ।

उनले राष्ट्र बैंकले बाह्य दबाब कम गरी विदेशी विनिमय सञ्चितिको समेत दबाब कम गर्न नीतिगत पहल भइरहेको बताए । गभर्नर अधिकारीले पछिल्लो समय कोभिडको असर कम भएसँगै अर्थतन्त्रमा समेत सुधार हुँदै गएको बताए ।

कोरोनाविरुद्ध खोपको पहुँच बढेकाले आर्थिक गतिविधि बढ्दै गएको भन्दै अर्थतन्त्रमा केही सुधार हुने संकेत देखिएको बताए । गभर्नर अधिकारीले कोरोना खोपका कारण अर्थतन्त्र केही सहज भए पनि रुस र युक्रेन बीचको युद्धका कारण महंगी बढ्न सक्ने बताए । चालू आर्थिक वर्षको शुरूदेखि नै विदेशी विनिमय सञ्चिति घटेको भन्दै विदेशी लगानी र विदेशी मुद्रा आर्जन सहज बनाउन नीतिगत व्यवस्था गरेको बताए ।

उनले भने, ‘विश्वभर महामारीको रूपमा फैलिएको कोभिड–१९ खोपको उपलब्धताका कारण महामारीको असर क्रमशः कम हुँदै गएको अनुभव गरेका छौं । कोभिडको असर कम भएसँगै आर्थिक गतिविधिहरूमा सुधार आएको छ । उद्योग तथा होटलहरूको अकुपेन्सीमा सुधार आएको अवस्था छ । कोभिड महामारीका कारण चालू आर्थिक वर्षको शुरूआत महिनामा आर्थिक गतिविधिहरू शिथिल रहे । राष्ट्र बैंकको कोभिड–१९ को असर सर्वेक्षण प्रविदेनले ४.२ उद्योग मात्रै बन्द भएको देखिएको थियो । अर्थतन्त्र पुनरुत्थानको क्रममा बैंक तथा वित्तीय संस्थाबाट आर्थिक वर्ष २०७८/७९ को शुरूआतमा अधिक कर्जा प्रवाह भएको र कर्जाको अधिकांश कर्जा आयात भुक्तानीमा गएका कारण चालू आर्थिक वर्षको शुरूआतदेखि नै सोधानान्तर स्थिति घाटामा रहन गयो । घाटा क्रमशः बढ्दै गएकाले विदेशी विनिमय सञ्चिति घट्न गएको छ । विदेशी विनिमय सञ्चिति घटेर ७ महिनाभन्दा कम समयको लागि वस्तु तथा सेवा आयात धान्न सक्ने स्थितिमा पुगेको हुँदा बाह्य क्षेत्र अहिले दबाबमा रहेको छ । देशको बाह्य क्षेत्र केही दबाबमा रहेको हुँदा समाधान गर्न नीतिगत पहल भइरहेको र विदेशी विनिमय सञ्चितिको दबाब कम गर्ने पहल भइरहेको छ । कोरोना खोपका कारण अर्थतन्त्र केही सहज भए पनि रुस र युक्रेनबीचको युद्धका कारण महंगी बढ्ने देखिएको छ । अधिक कर्जा प्रवाह भएको र कर्जाको अधिकांश कर्जा आयात भुक्तानीमा गएका कारण चालू आर्थिक वर्षको शुरूआतदेखि नै सोधनान्तर स्थिति घाटामा रहेको छ । यो केही समय कायम रहने देखिन्छ । पछिल्लो समय विदेशी मुद्रा सञ्चिति स्थिर रहेको छ । आगामाी दिनमा थप काम गर्न राष्ट्र बैंक प्रतिबद्ध छ । थप उपायहरू नेपाल सरकारले हिजो मात्रै गरेको छ, आयात बन्देजको सल्लाह राष्ट्र बैंकले दिएको हो, कार्यान्वयन गरौं । सबै सरोकारवालाहरूको सहयोग हुने आशा गरेको छु ।’