गोरखाको पालुङटारमा नेपाली कांग्रेस र जनता समाजवादी पार्टी (जसपा)बीचको तालमेल भाँडिएको छ । 

कांग्रेस गोरखाका सभापति नन्दप्रसाद न्यौपानेले  बुधवार कांग्रेस पालुङटारका सभापतिलाई परिपत्र गर्दै कांग्रेस एकलरुपमा निर्वाचन जाने निर्णय भएकाले सोहीअनुरुप चुनावी अभियान सञ्चालन गर्न निर्देशन दिएका हुन् । 

केन्द्रीय नेतृत्वबीच पालुङटारमा कांग्रेसले जसपालाई प्रमुखमा सघाउने र जसपाले कांग्रेसलाई उपप्रमुखमा सघाउने सहमति भएको थियो । तर, जिल्लास्तरमा सहमति नजुटेपछि तालमेल भाँडिएको हो । 

सभापति न्यौपानेले दुवै दलका कार्यकर्ताहरूले एकलरुपमा निर्वाचन जाने राय दिएकाले स्वस्थ र मित्रवत् प्रतिष्प्रधा गर्ने सहमति भएको जानकारी दिएका छन् । 

पालुङटार र गोरखा नगरपालिकामा नेपाली कांग्रेस र जसपाबीच चुनावी तालमेल गर्न केन्द्रले निर्देशन दिएको थियो । तर, जिल्लामा दुवै दलको बैठकले एक्लाएक्लै चुनावमा जाने सहमति गरेको न्यौपानेले जानकारी दिए । 

पालुङटार नगरपालिका जसपाका संघीय परिषद् अध्यक्ष बाबुराम भट्टराईको गृहनगर हो ।