सत्ता गठबन्धनका तर्फबाट ताराखोला गाउँपालिका बागलुङका  अध्यक्ष पदका उमेदवार धन बहादुर बिक 'हिमाल'ले आफूले चुनाव जिते सरकारी सेवा सुविधा केही नलिने र महँगो गाडी पनि नचढ्ने घोषणा गरेका  छन्। चुनावी प्रचार प्रसार अभियानको सन्दर्भमा वडा नम्बर ४ साँगुबोटमा पुगेका हिमालले सरकारी सेवा सुविधामा  जनप्रतिनिधिको आँखा गडेका कारण जनप्रतिनिधिकै बदनाम भएको बताए। 

“जनतामा संघीयता र स्थानीय स्वशासन धेरै खर्चिलो भयो भन्ने परेको छ, गाउँ गाउँमा राजा जन्मिएर पाल्न गाह्रो भयो भन्ने परेको छ। एउटा गाउँ पालिकाको जनप्रतिनिधि करोडौँको गाडी चढ्नु भनेको दुखी गरिब जनताको सरासर अपमान गर्नु हो,' उनले भने , 'तपाईहरु ढुक्क हुनुहोस् हिमालले  तपाईंहरुको करको पैसामा भोज भतेर गरेर कहिल्यै हिँड्ने छैन, दिनरात माला लगाएर हिँड्नेछैन, महँगो गाडी चढ्ने छैन। 

आफू ताराखोलाका परिश्रमी जनताको सुखदुःख सहेर हुर्किएको  छोरा भएको भन्दै उनले छोराले कहिल्यै पनि जन्मभूमिलाई घात नगर्ने बताए । उनले भने,  'आज म जे छु त्यो तपाईंहरुकै कारण छु, बाँचुन्जेल तपाईहरु सँग नै रहनेछु। तपाईंहरुको एक भोट खेर जाने दिनेछैन।'