आजदेखि एकसाथ दुई नेपाली चलचित्र प्रदर्शनमा आएका छन् । २०७९ सालमा एकसाथ दुई चलचित्र प्रदर्शनमा आएको आज पहिलोपटक हो । ‘लक्का जवान’ र ‘षट्कोण’ आजदेखि देशव्यापी प्रदर्शनमा आएका चलचित्र हुन् ।  

शिवहरी पौड्यालको लेखन, निर्देशनमा तयार पहिलो फिचर चलचित्र हो, ‘लक्का जवान’ । कोरोना महामारीअघि नै निर्माण भएको चलचित्र बल्ल प्रदर्शनमा आउन लागेको हो । चलचित्रमा चलचित्रमा हास्य कलाकारहरुको ठूलो टोली रहेको छ । 

मदनकृष्ण श्रेष्ठ, प्रियंका कार्की, दीलिप रायमाझी, सलोन बस्नेत, वर्षा शिवाकोटा, किरण केसी, राजाराम पौडेल, शिवहरी पौड्याल, सरोज खनाल, सुशिल पोखरेल, सुरेन्द्र केसी, स्वर्गिय जयनन्द लामा आदी कलाकारको यस चलचित्रमा अभिनय रहेको छ ।

ध्रुव वन्तको प्रस्तुती रहेको चलचित्रमा अनुसुया श्रेष्ठ वन्त निर्माताका रुपमा छिन् । किरण केसी, शिवहरी पौड्याल र दीलिप रायमाझी चलचित्रको कार्यकारी निर्माता हुन् । सामाजिक विषयवस्तुमा रहेर कमेडी शैलीमा निर्माण भएको चलचित्रलाई दर्शकले रुचाउने निर्माण टिमले विश्वास लिएको छ । 

यता, आजदेखि प्रदर्शनमा आएको ‘षट्कोण’ थ्रिलर जनरामा निर्माण भएको हो । मिलन डि काप्रीको निर्देशनमा बनेको चलचित्रमा कार्म, भोलाराज सापकोटा, लोकेन्द्र लेखक, सुयशा अधिकारी, विराज कडरिया, शिशिर लिम्बु वानेम, बाल कलाकार असिम लामाको अभिनय रहेको छ ।

शिशिर लिम्बु वानेमको कथा तथा पटकथा रहेको चलचित्रको संवाद महेश दवाडीले लेखेका हुन् । थ्रिलर रुचाउने दर्शकका लागि ‘षट्कोण’ उपयुक्त चलचित्र हुने निर्माण टिमले बताएको छ । यी दुई नेपाली चलचित्रसँगै हलिउड चलचित्र  ‘डक्टर स्ट्रेन्ज २’ नेपाली हलमा प्रदर्शनमा आएको छ ।