स्थानीय चुनावका क्रममा रुकुम पश्चिमको बाँफिकोट गाउँपालिकामा एक जनाको मृत्यु भएको छ ।​​

बाँफिकोट गाउँपालिका अध्यक्षका कांग्रेस उम्मेदवार जनककुमार बाँठा मगर चढेको गाडीले ठक्कर दिँदा ७ नम्बर वडाका ७० वर्षीय प्रवीण खत्रीको मृत्यु भएको प्रदेश प्रहरी कार्यालय कर्णालीले जनाएको छ ।

मतदान केन्द्र स्थलगत निरीक्षणका लागि जाँदै गरेका बाँठा चढेको गाडीले मतदानका लागि जाँदै गरेका खत्रीको मृत्यु भएको हो ।

सवारी चालकलाई प्रहरीले नियन्त्रणमा लिएको छ ।

माओवादीको दावी– 'दुर्घटना हैन, हत्या हो'

यता, नेकपा (माओवादी केन्द्र) रुकुमले भने निर्वाचनको दिन शुक्रवार भएको घटना नियोजित हत्या भएको दाबी गरेको छ ।

कांग्रेसका गाउँपालिका अध्यक्षका उम्मेदवारले नै गाडी चलाएर आफ्ना कार्यकर्ताको हत्या गरेको माओवादीको दाबी छ ।

मृतक माओवादी निकट योङ्ग कम्युनिस्ट लीगका स्थानीय नेताको बुवा रहेको माओवादीले जनाएको छ ।

घटनापछि रुकुम क्षेत्र तनावग्रस्त बनेको छ ।

नेपाली कांग्रेसका कार्यकर्ता खुकुरी लिएर मतदान केन्द्रवरिपरि घुमिरहेको माओवादीले दाबी गरेको छ ।