भारतका प्रधानमन्त्री नरेन्द्र मोदीले सोमवार गर्न लागेको  लुम्बिनी भ्रमणका विषयमा भारतको विदेश मन्त्रालयले शुक्रवार विशेष प्रेस ब्रीफिङ गरेको छ । 

उक्त ब्रीफिङमा सम्बोधन गर्दै विदेशसचिव विनयमोहन क्वात्राले प्रधानमन्त्री मोदीको यो भ्रमणले नेपाललाई भारतले दिएको उच्च महत्त्वलाई झल्काउने बताएका छन् । 

अहिले नै किन मोदीले लुम्बिनीको भ्रमण गरेको भनी एक भारतीय पत्रकारले सोधेको प्रश्नमा क्वात्राले नेपाल र भारतबीचको पुरानो समयदेखिको सांस्कृतिक सम्बन्धलाई प्रधानमन्त्री मोदीले बारम्बार दोहोर्‍याउने गरेको बताए । 

बुद्ध जयन्तीको पवित्र अवसरमा प्रधानमन्त्री मोदीले लुम्बिनीको भ्रमण गर्नुमा कुनै गोप्य उद्देश्य नरहेको क्वात्राको भनाइ छ । 

बौद्ध धर्म पनि दुई देशबीचको साझा सभ्यतागत विरासत भएको उनले बताए । प्रधानमन्त्रीको भ्रमणले उक्त सभ्यतागत सम्बन्धलाई उत्सवका रूपमा मनाएको उनको कथन छ । 

यसमा अतिरिक्त अर्थ निकाल्नुभन्दा पनि भारतको छिमेक पहिले नीतिलाई विचार गर्नुपर्ने क्वात्राले बताए ।

अर्की एक भारतीय पत्रकारले प्रबुद्ध व्यक्तिहरूको समूहले बुझाएको प्रतिवेदनलाई भारतका प्रधानमन्त्रीले बेवास्ता गरेको विषयमा प्रश्न सोध्दा क्वात्राले उक्त प्रतिवेदन प्रधानमन्त्रीसमक्ष पेश नै नभएको बताए । पेश भएपछि मात्र त्यसको समीक्षा गर्ने उनको भनाइ छ ।