स्थानीय तहको निर्वाचनमा देशभर करीब ६४ प्रतिशत मत खसेको निर्वाचन आयोगले प्रारम्भिक अनुमान गरेको छ । 

प्रमुख निर्वाचन आयुक्त दिनेश कुमार थपलियाले अधिकतम ७५ प्रतिशतसम्म र न्यूनतम ५० प्रतिशत मतदान भएको बताए । 

‘औसतमा ६५ देखि ७२ प्रतिशत मतदान हुन्छ भन्ने अपेक्षा थियो । तर, त्यसअनुसारको मतदान हुन सकेन । जहाँ धेरै मतदान हुन्छ भने अपेक्षा थियो त्यही कम मतदान भयो’, थपलियाले भने । 

काठमाडौं महानगरपालिकामा अपेक्षा गरेभन्दा निकै कम मत खसेको थपलियाले बताए । 

‘किन मतदान कम भयो भन्ने अरु कारण पहिल्याउन बाँकी छ । काठमाडौं महानगरमा शान्तिपूर्ण मतदान, मतदान केन्द्रमा सबैको पहुँच हुदा पनि अपेक्षा गरे अनुसारको मतदान भएन’, थपलियाले भने । काठमाडौंमा ५२ प्रतिशत मात्रै मतदान भएको आयोगको प्रारम्भिक अनुमान छ ।

मतदान स्थगित भएको स्थानीय तहमा भने पुनः मतदान भएपछि मात्रै मतगणना हुने थपलियाले बताए । 

केही स्थानीय तहले आजै रातीदेखि मतगणना प्रारम्भ गर्ने र केही स्थानीय तहमा भोली बिहानैदेखि मात्रै मत गणना शुरू हुने भनेर निर्वाचन अधिकृतको कार्यालयले सूचना प्रकाशन गरेको उनले बताए । 

निर्वाचनको क्रममा सन्तोषजनक रुपमा सुरक्षाको व्यवस्था नभएकोमा आयोगले असन्तुष्टि व्यक्त गरेको छ । 

राजनीतिक दल र उम्मेदवारले पनि सुझबुझपूर्ण सहयोग नगरेको आयोगले बताएको छ । 

केही स्थानीय तहमा साना विवादलाई पनि उग्र बनाएर निर्वाचनको वातावरण बिगार्न राजनीतिक दल र उम्मेदवार नै उद्यत देखिएको र त्यसले आयोगलाई चिन्तित भएको थपलियाले बताए ।