नेकपा एमालेका सांसद भीम रावलले सरकारले व्याख्यात्मक टिप्पणीपछि अमेरिकालाई पठाएको पत्र सार्वजनिक गर्न माग गरेका छन् ।

उनले बिहीवारको प्रतिनिधि सभामा भइरहेको पूर्व बजेट छलफलमा बोल्ने क्रममा उक्त माग गरेका हुन् ।

रावलले नेपालले व्याख्यात्मक टिप्पणीपछि अमेरिकालाई पठाएको पत्र तुरुन्त सार्वजनिक गर्न र संसदलाई जानकारी दिन आग्रह गरे ।

रावलले भने, ‘एमसीसीसँगको सम्झौतामा उल्लेख भएको राष्ट्रिय हितविपरीतका विषयलाई अर्थ मन्त्रालयले सम्बोधन गरेको छ कि छैन ? त्यसको जानकारी संसदलाई गराउनु पर्दैन ?’ उनले व्याख्यात्मक टिप्पणीमा भनेअनुसार एमसीसीले नेपाललाई पत्र पठाएको हो कि होइन भन्ने विषयमा पनि स्पष्ट जवाफ माग गरेका छन् ।

संसदले भने अनुसार सरकारले काम नगरेको र अमेरिकालाई पठाएको पत्रसमेत जानकारी नगराउनु वर्तमान सरकारप्रति शंका गर्ने ठाउँ भएको रावलले बताए ।

रावलले अर्थतन्त्रमा देखिएको समस्या समाधानमा सरकार प्रतिबद्ध हुन नसकेको पनि आरोप लगाए । अर्थमन्त्रीले संसदमा पेश गरेको विनियोजन विधेयकको २०७९ को सिद्धान्त र प्राथमिकता अहिलेको अवस्थाको अर्थतन्त्र सुधार गर्ने खालको नभएको रावलको भनाइ छ ।  उनले यो विधेयक केवल झारा टार्ने गरी मात्रै तयार गरिएको आरोप लगाए ।

रावलले भने, ‘अर्थतन्त्रमा देखिएको समस्या समाधानमा सरकारले प्राथमिकता दिनुपर्ने अवस्थामा पनि सरकार चुपचाप बसिरहेको छ । अर्थतन्त्रमा समस्या छ भने विदेशी मुद्राको विनिमय सञ्चित घटिरहेको छ, राष्ट्र ऋण पनि कुल  गार्हस्थ्य उत्पादन (जीडीपी)को ४०.५ प्रतिशत पुगिसक्दा पनि सुधार गर्न सरकार गम्भीर देखिएन ।’

नेकपा एमालेका प्रमुख सचेतक विशाल भट्टराईले अर्थमन्त्रीलाई सुझाव दिने र सुझाव सुन्नुपर्ने व्यक्ति नै संसदमा उपस्थित नभएकोमा जवाफ माग गरे । भट्टराईले भने, ‘अर्थमन्त्रीको उपस्थिति विना कसलाई सुझाव दिने र कसले टिपोट गरेर संसदले दिएको सुझाव बजेटमा समेटिन्छ ?’