सभामुख अग्नि सापकोटाले सुन्दरी प्रतियोगितामा सहभागी माथि भएको बलात्कार प्रकरणका दोषिमाथि शीघ्र छानविन गरी कानूनको दायरामा ल्याउन सरकारलाई रुलिङ गरेका छन् । 

शुक्रवार बसेको प्रतिनिधि सभा बैठकमा कांग्रेस महामन्त्री गगन थापाले सभामुखमार्फत सरकारको ध्यानाकर्षण गराएपछि सापकोटाले रुलिङ गरेका हुन् । 

‘माननीय सदस्यले आफ्नो भनाइ राख्दै गर्दा प्रारम्भमा राख्नुभएको यौन हिंसासम्बन्धी विषयमा मेरो गम्भीर ध्यानाकर्षण भएको छ । सो सम्बन्धमा शीघ्र छानविन गरी, सत्यतथ्य पहिचान गरी दोषीलाई कानूनको दायरामा ल्याउन सरकारलाई निर्देशन गर्दछु,’ सापकोटाले भने ।

त्यसअघि कांग्रेस महामन्त्री थापाले सुन्दरी प्रतियोगिताको नाममा युवतीमाथि भएको बलात्कार काण्डको अनुसन्धान अगाडि बढाउन सरकारको ध्यानाकर्षण गराएका थिए । 

प्रतिनिधि सभा बैठकमा विनियोजन विधेयकका सिद्धान्त र प्राथमिकतामाथिको छलफलमा भाग लिने क्रममा महामन्त्री थापाले यत्रो विषय सार्वजनिक भइसकेको अवस्थामा अभियोग लागेको व्यक्तिलाई तत्कालै अनुसन्धानको दायरामा ल्याउन माग गरेका हुन् । 

‘हिजो साँझ घर जाँदाखेरी श्रीमती र २ वटा साना साना छोरीहरू सामाजिक सञ्जालमा आएको भिडियो हेरिरेहका थिए, जसमा एकजना नौजवान युवतीले ८ वर्ष अगाडि आफूलाई बलात्कार गरेको घटना बताइरहेकी थिइन् । त्यो हेरिरहँदा उनीहरूको प्रतिक्रिया उनीहरूको अनुहारमा परिरहेको र मेरो छोरी डराएको सम्झन्छु,’ थापाले संसदमा भने, ‘सभामुखमार्फत सरकारलाई ध्यानाकर्षण गराउन चाहन्छु, यत्रो विषय सार्वजनिक भएको अभियोग लागेकाले तत्कालै अनुसन्धानको दायरामा ल्याउन आग्रह गर्न चाहन्छु । संसदबाट बनाएको बलात्कारसम्बन्धी कानून, फाैजदारी संहिताको हदम्याद सन्दर्भमा पुनर्विचार गर्न सरकारलाई निर्देशन दिनका लागि अनुरोध गर्दछु ।’ 

सुन्दरी प्रतियोगितामा सहभागी भएबापत आफूमाथि चरम शोषण भएको भन्दै एक युवतीले सामाजिक सञ्जाल मार्फत घटना बाहिर ल्याएकी थिइन् । बलात्कारसम्बन्धी मुद्दामा हदम्यादबारे पुनर्विचार गर्न माग गर्दै बालुवाटारमा शुक्रवार स्वतःस्फूर्त प्रदर्शन भएको थियो ।