नेपाली कांग्रेसका महामन्त्री गगनकुमार थापाले गठबन्धनमा रहेका दलहरूको संगठन कमजोर भएको कारण उनीहरुको मत कम आएको बताएका छन् । 

शुक्रबार प्रतिनिधि सभाको बैठकमा सहभागी हुन संसद भवन पुगेका सांसद थापाले कांग्रेसका मतदाताले रूख बाहेक अन्य चिन्हमा मतदान गर्न पनि कठिन भएको बताए । 

उम्मेदवार र नेताहरुले गठबन्धनमा भोट हाल्न आव्हान गरेको भए पनि कांग्रेसका मतदाता कम्युनिष्ट पार्टीको जस्तो संगठित नभएकाले कतिपयले नमानेको उनले बताए । 

‘नेपाली कांग्रेसको मतदाताले आफ्नो चुनाव चिन्ह बाहेकको अर्को चुनाव चिन्हमा मत हाल्ने, मत हाल्न लगाउने कुरा एकदमै गाह्रो कुरा हो । कांग्रेसको मतदाताहरु अन्य पार्टीको जस्तो संगठित मतदाता होइन । कसैले धोका दिन्छ र धोका दिन्न भन्ने कुरा होइन । मैले बुझेसम्म नेपाली कांग्रेसको पार्टी उम्मेदवार, पार्टी कार्यकर्ताहरु खटिएर लागेका थिए, आफुसँग तालमेलमा भएका दलहरूलाई पनि सँगै मत हालौँ भनेरै लागेकाे थिए’, थापाले भने । 

उनले काठमाडौंको उदाहरण दिदैं भने, ‘म काठमाडौंको मेयरमा रुख, उपमेयरमा कलम चिन्ह लिएको गठबन्धनलाई लिएर मतदाताको बिचमा गएँ । तर, मैले आफ्नै वडामा हेरें वा कतै पनि हेरें भनेदेखि त्यो दुईवटाको बिचमा असाध्यै धेरै ठूलो फरक पाउँछु । हामी कसैले कलम चिन्ह लिएको उपमेयरको उम्मेदवारलाई धोका दियौँ वा कम मत दियौँ भनेर होइन । हामीले मतदातालाई आव्हान गर्‍यौँ । हाम्रो कुरा, हाम्रो मतदाता भनेको चाहीँ हाम्रो आदेश पालना गर्ने, हामीसँग असाध्यै धेरै कम्युनिष्ट पार्टीको जस्तो संगठित मतदाता होइन ।’ 

काठमाडौंमा उपमेयरमा उम्मेदवारी दिएको पार्टीको आफ्नो मतदाता २० प्रतिशत जति रहेको र जित्नका लागि १०० मान्ने हो भने अर्को ८० प्रतिशत कांग्रेसले खन्याइदिनु पर्ने अवस्था रहेको थापाले बताए । 

‘नेपाली कांग्रेस भएको ठाउँमा नेपाली कांग्रेस ८० छ । उसलाई २० थपिदिँदा खेरी १०० हुने हो । कम्युनिष्ट पार्टीको ठाउँबाट एउटा थप्न पनि सजिलो । उहाँहरुको कार्यकर्तामा आधारित पार्टी छ । अर्को थोरै थप्नुपर्ने भएकाले पनि त्यो व्यवहारिक भयो । कांग्रेसलाई चाहीँ गठबन्धनमा जाँदै गर्दाखेरी अन्य पार्टीले भोट हालेको जस्तो । कांग्रेसले अन्य चिन्हमा भोट नहालेको जस्तो देखिनुको मुख्य कारण यही हो जस्तो लाग्छ’, थापाले भने ।