रुपन्देहीको तिलोत्तमा नगरपालिकामा जारी मतगणनामा नेपाली कांग्रेसबाट प्रमुख पदका उम्मेदवार रामकृष्ण खाणले अग्रता लिएका छन् । 

खाण र नेकपा (एमाले) का मोहन चापागाईबीच तीव्र प्रतिस्पर्धा छ । 

पछिल्लो मत परिणामअनुसार कांग्रेसका खाण १७७ मत अन्तरले अगाडि छन् । खाणले ११ हजार ३६६ मत पाउँदा एमालेका चापागाईंले ११ हजार १८९ मत पाएका छन् । रामकृष्ण गृहमन्त्री बालकृष्ण खाणका सहोदर भाइ हुन् । 

उपप्रमुखमा भने शुरूदेखि नै एमालेकी जागेश्वरीदेवी चौधरी अगाडि छिन् । उनले १० हजार ८६७ मत प्राप्त गर्दै माओवादी केन्द्रका उम्मेदवार हेमलाल पाण्डेलाई दोब्बर मत अन्तरले पछाडि पारेकी छन् । पाण्डेले ५ हजार ४३४ ल्याएका छन् । अहिलेसम्म २९ हजार ३२४ मतगणना भएको छ ।

तिलोत्तमामा वडा नम्बर १, २, ३, १५, १६, १७ को मतगणना सम्पन्न भएको छ । ४, ५, १३ र १४ को गणना भइरहेको छ । 

गणना सकिएका ६ वडामध्ये ४ वटामा नेपाली कांग्रेसले जितेको छ । २ वटा एमालेले जितेको छ ।