अमेरिकाले लामै समयका लागि पूर्वी युरोपमा एक लाख सैनिकहरू तैनाथ गर्ने योजना बनाएको सीएनएनले विभिन्न अधिकारीहरूलाई उद्धृत गर्दै खबर दिएको छ ।

नेटोमाथि रुसबाट जोखिम भएमा वा फिनल्यान्ड र स्विडनमाथि खतरा भएमा अमेरिकाले सैनिकको संख्या बढ्न पनि सक्छ । 

नेटोले पूर्वी युरोपमा थप सैन्य अभ्यास गरेमा वा सुरक्षा वातावरण परिवर्तन भएमा अमेरिका थप सैनिक तैनाथ गर्ने वा सैन्य अड्डा बनाउने सम्भावना रहेको अधिकारीहरूले बताए । 

स्विडन र फिनल्यान्डले नेटोमा प्रवेशका लागि निवेदन दिएको भए पनि उनीहरूको रक्षाका लागि अमेरिकाले थप सैनिक तैनाथ गर्ने प्रतिबद्धता व्यक्त गरेको छैन । तर ती देशको सीमानजिक रुसले हतियार ल्याएमा अमेरिकाले थप सैनिक तैनाथी गर्न सक्छ । ती दुई देशको निवेदनमाथि विचार गरिँदै गर्दा नेटोका केही सदस्य मुलुकहरूले आधिकारिक संरचना बाहिर रहेर उनीहरूलाई सहयोग गर्न सक्छन् । 

गत मार्च महिनामा अमेरिकाले युरोपमा आफ्नो सैनिक संख्या बढाएर एक लाख पुर्‍याएको थियो । अमेरिकी सेनाको युरोपीयन कमान्डले थप तैनाथीका लागि रुसी आक्रामकतालाई दोषी ठहर गरेको थियो । 

तीमध्ये अधिकांश सैनिक पोल्यान्ड र जर्मनीमा छन् । त्यसपछिको संख्या इटली र बेलायतमा छ । युक्रेन द्वन्द्व चर्किरहेको बेलामा बाल्टिक मुलुकहरूले अमेरिकालाई थप सैनिक तैनाथी गर्न भनिरहेका छन् ।