नेपाल राष्ट्र बैंकका गभर्नर महाप्रसाद अधिकारीले अर्थतन्त्र बचाउनका लागि भूमिका खेल्न निजी क्षेत्रलाई अपिल गरेका छन् ।

अहिलेको अवस्था निजी क्षेत्रको नाफा जोगाउनुभन्दा ठूलो अर्थतन्त्र बचाउनुमा लाग्नुपर्ने बताएका छन् ।

नेपाल उद्योग वाणिज्य महासंघले आइतवार राजधानीमा आयोजना गरेको आर्थिक स्थायित्वका लागि महासङ्घको पहल विषयक कार्यक्रमलाई सम्बोधन गर्दै अधिकारीले यस्तो बताएका हुन् ।

उनले भने, 'अर्थतन्त्रको अवस्था जोगाउनुपर्ने छ, अहिले निजी क्षेत्रले बढी नाफामा जोड नदिनु । पहिले अर्थतन्त्र जोगाउनुपर्छ, अर्थतन्त्रको स्थायित्व गर्न तर्फ लागौँ त्यसपछि व्यावसाय प्रवर्द्धन गर्न लागौँला ।' 

उनले बजारमा व्यापार घाटाले गर्दा तरलता अभाव भएको स्पष्ट पारे । 

अहिले तरलता अभाव कर्जा विस्तारले भएको नभई व्यापार घाटाले भएको उनले प्रष्ट्याए ।

गभर्नर अधिकारीले  व्यापार घाटा घटाउन र उपभोग्य वस्तुको खपत कम गर्न बैंकले ब्याजदर बढाएको बताए । 

उनले भने, 'बैंकको कर्जा बढेर केही समस्या भएको छैन, घरजग्गा वा जता कर्जा गएपनि त्यो बैँकमै आउने पैसा हो । व्यापार घाटाबाट बाहिर गएको पैसा मात्रै फिर्ता नआउने पैसा हो ।' 

उनले वर्षेनी आयात बढ्दै जानु चिन्ताको विषय भएको उल्लेख गरे । 

यस्तो आयात अहिले परिणाम र मूल्य दुवैले बढेको  उनको भनाइ छ ।