सुक्खा पहिरो खस्दा पाल्पा–बुटवल सडक अवरुद्ध भएको छ । 

सिद्धार्थ राजमार्गअन्तर्गत पर्ने सडकको तिनाउ गाउँपालिका–५, कालीमाटीमा सोमवार दिउँसो सुक्खा पहिरो खसेपछि सडक अवरुद्ध भएको हो ।

सडकमा ढुंगा र बाँसको झाडीसहित सुक्खा पहिरो खसेको हो । 

अहिले पाल्पादेखि बुटवलतर्फ जाने तथा बुटवलदेखि पाल्पातर्फ आउने सवारीसाधन सडकमै रोकिएका छन् । सडक पूर्णरुपमा अवरुद्ध छ । 

ट्राफिक प्रहरी कार्यालय पाल्पाका प्रमुख दामोदर मल्लले भर्खरै मात्र एउटा जेसीबीले पहिरो पन्छाउने काम शुरू भएको जानकारी दिए ।

 ‘पहिरो ठूलै छ । भर्खरै एउटा जेसीबी आएर पहिरो पन्छाउने काम गर्दैछ,’ मल्लले लोकान्तरसँग भने,  ‘सडक एकतर्फी खुलाउन पनि कम्तीमा डेढ–दुईघण्टा लाग्ने देखिन्छ ।’ 

सोही स्थानमा केही दिनअघि पनि सुक्खा पहिरो खसेको थियो ।