नेपाल प्रहरीका नायव महानिरीक्षक वसन्त लामालाई अतिरिक्त महानिरीक्षक पदमा बढुवा गर्ने निर्णय सरकारले गरेको छ । 

जेठ ६ गते बसेको मन्त्रिपरिषदको बैठकको जानकारी गराउन सोमवार सिंहरदबारमा आयोजित पत्रकार सम्मेलनमा सूचना तथा सञ्चारप्रविधि मन्त्री ज्ञानेन्द्र कार्कीले लामालाई बढुवा गर्ने निर्णय भएको जानकारी गराएका हुन् । 

त्यसैगरी सरकारले सशस्त्र प्रहरी नायव महानिरीक्षक नारायणदत्त पौडेललाई अतिरिक्त महानिरीक्षक पदमा बढुवा नियुक्त गर्ने निर्णय गरेको छ । 

वैशाख ३० गते सम्पन्न स्थानीय तह निर्वाचन सफलतापूर्वक सम्पन्न गरेकोमा निर्वाचन आयोग र विभिन्न क्षेत्रबाट सहयोग गर्ने सबैलाई धन्यवाद दिने निर्णय भएको कार्कीले बताए । 

सरकारले वैदेशिक रोजगारबाट फर्किएकाहरूको पुनः एकीकरण आयोजनाका लागि स्वीजरल्याण्ड सरकारबाट प्राप्त हुने ८६ करोड १३ लाख अनुदान स्वीकार गर्ने निर्णय गरेको पनि कार्कीले जानकारी दिए । 

त्यसबाहेक, विश्व बैंकबाट यातायात तथा व्यापार आबद्धता अभिवृद्धि कार्यक्रमका लागि प्राप्त हुने ३३ अर्ब ऋण सहायता सम्बन्धमा वार्ता टोली गठन गर्ने निर्णय भएको कार्कीले बताए ।