डेनमार्कले युक्रेनलाई हारपून एन्टी शिप क्षेप्यास्त्र र लोन्चरहरू पठाउने अमेरिकाका रक्षामन्त्री लोयड अस्टिनले सोमवार जानकारी दिएका छन् । 

कतिवटा हतियार पठाउने भनी उनले खुलाएनन् । 

यी क्षेप्यास्त्रहरूले युक्रेनको तटक्षेत्रलाई प्रतिरक्षा गर्ने अस्टिन र अमेरिकाका शीर्ष सैन्य अधिकृत जनरल मार्क मिल्लीको भनाइ छ । 

युक्रेन डिफेन्स कन्ट्याक्ट ग्रू्रपको भर्चुअल बैठकपछि उनीहरूले पत्रकारहरूलाई यसको जानकारी दिएका हुन् । 

उक्त ग्रूप युक्रेनलाई हतियार दिन इच्छुक ४७ मुलुकहरूको समूह हो । युक्रेनका रक्षामन्त्री अलेक्सी रेज्निकोभ तथा अन्य अधिकारीले युक्रेनको आवश्यकताका बारेमा अन्य मुलुकका रक्षामन्त्रीहरूलाई बताएका थिए । 

डेनमार्कले दिएको क्षेप्यास्त्रका अलावा चेकियाले हेलिकप्टर, ट्यांक र मल्टिपल रकेट लोन्चर सिस्टम पनि दिने प्रतिबद्धता गरेको छ । युक्रेनले लामो दूरीको आर्टिलरी, ट्यांक र सशस्त्र वाहनका साथै ड्रोन मागिरहेको अस्टिनको भनाइ छ ।

बोइङ कम्पनीले बनाएको हारपून अमेरिकी जलसेनाको उच्चस्तरीय एन्टी शिप क्षेप्यास्त्र हो । यसको अनुमानित दायरा ३०० किलोमिटर छ । यसको सक्रिय रेडार गाइडेन्सले यसलाई घातक बनाउँछ । हारपून क्षेप्यास्त्र जहाज वा विमानबाट प्रहार गर्न सकिन्छ ।