सत्तारूढ र विपक्षी दल सम्बद्ध १५ विद्यार्थी संगठनले उद्योग, वाणिज्य तथा आपूर्ति मन्त्री दीलेन्द्र बडूलाई भेटेर पेट्रोलियम पदार्थमा भएको मूल्यवृद्धि खारेज गर्न माग गरेका छन् । 

मन्त्री बडूलाई ध्यानाकर्षण पत्र बुझाउँदै उनीहरूले ७ वटा माग पेश गरेका छन् । 

पेट्रोलियम पदार्थ र ग्यासमा गरिएको मूल्यवृद्धि खारेज हुनुपर्ने, एलपी ग्यास र मट्टितेलमा विद्यार्थीलाई सहुलियत दिनुपर्ने, पेट्रोलियम पदार्थमा लगाइएको कर पुनर्विचार गर्नुपर्नेलगायतका माग छन् ।

मन्त्रीलाई बुझाइएको ध्यानाकर्षण पत्रमा कांग्रेस सम्बद्ध नेपाल विद्यार्थी संघका अध्यक्ष दुजाङ शेर्पा, एमाले सम्बद्ध अनेरास्ववियूकी अध्यक्ष सुनिता बराल, माओवादी केन्द्र सम्बद्ध अखिल (क्रान्तिकारी)की अध्यक्ष पञ्चा सिंह, एकीकृत समाजवादी निकट अनेरास्ववियूका अध्यक्ष सुदेश पराजुलीलगायतका विद्यार्थी संगठनका नेताहरूले हस्ताक्षर गरेका छन् ।