विवेकशील साझाका अध्यक्ष रविन्द्र मिश्रले पदबाट राजीनामा दिएका छन् । निर्वाचनमा निराशाजनक परिणाम आएको भन्दै उनले बुधवार पदबाट राजीनामा दिएका हुन् । 

मिश्रले आफू पार्टीको साधारण सदस्य भने रहिरहने जनाएका छन् । उनले निर्वाचन परिणामको सम्पूर्ण जिम्मेवारी पनि लिएका छन् । 

‘हाम्रा उम्मेदवारहरू इमानदार र सक्षम हुँदाहुँदै राम्रो नतिजा हासिल गर्न नसक्नुको जिम्मेवारी पार्टी नेताका रूपमा मैले लिनुपर्छ,’ उनले भनेका छन् । 

यस्तै उनले विवेकशील साझाबाट  पार्टी संयोजकलगायतलाई गरिएको कारबाही फिर्ता गरिदिन पनि कार्यसम्पादन समिति र केन्द्रीय समितिलाई अनुरोध गरेका छन् ।

‘मैले प्रस्तुत गरेको ‘विचारभन्दा माथि देश’ दस्तावेज पार्टीको केन्द्रीय समितिको दुई तिहाइभन्दा बढी मतले पारित गरेको भए पनि बहुमतको निर्णयविरुद्ध भएका गतिविधिका कारण पार्टी संयोजकलगायत कतिपयलाई कारबाही गरिएको थियो । सो दस्ताबेज प्रस्तुत गर्ने अध्यक्षले नै राजीनामा दिइसकेपछि, ती कारबाहीहरू फिर्ता गरिदिन म पार्टीको केन्द्रीय कार्य सम्पादन समिति तथा केन्द्रीय समितिलाई विनम्र अनुरोध गर्दछु,’ उनले राजीनामा पत्रमा लेखेका छन् । 

त्यस्तै, सो दस्तावेजप्रति असहमति राखेर राजीनामा दिएकाहरूलाई पनि पुनः पार्टीमा सामेल हुन उनले आग्रह गरेका छन् । विवेकशील साझाले मिलन पाण्डेलगायतलाई कारबाही गरेको थियो । 

मिश्रले आफूबाट भएका कमजोरी र त्रुटिप्रति पनि क्षमा याचना गरेका छन् ।