रूपन्देहीको सैनामैना नगरपालिकाको मेयरमा २०७४ सालको स्थानीय तह निर्वाचनमा नेकपा एमालेका चित्रबहादुर कार्कीले नेपाली कांग्रेसका उम्मेदवार फणिन्द्र शर्मालाई २ हजार ७२७ मतान्तरले पराजित गरेका थिए । कार्कीले १३ हजार ३९ मत ल्याउँदा शर्माले १० हजार ३०९ मत ल्याएका थिए । 

एमालेले ५ वर्षपछि यसपालिको चुनावमा उनै कार्की र उपमेयरमा पनि पुरानै बीना राना मगरलाई उम्मेदवार बनायो । कांग्रेसले पनि उनै शर्मालाई उम्मेदवार दोहोर्‍यायो ।

पुरानै अनुहार कार्की र शर्मा चुनावी मैदानमा आमनेसामने भए तर नतिजा फरक आयो । यसपटक शर्माले कार्कीलाई ५८२ मतान्तरले पराजित गरेर पुरानो हारको बदला लिए ।

शर्माले १५ हजार ६८६ मत ल्याउँदा कार्की यसपटक १५ हजार १०४ मतमै खुम्चिए । उपमेयरमा राना दोस्रोपटक पनि निर्वाचित भइन् ।

‘जनताले यसअघि चित्रबहादुरलाई जिताए । यसपटक मलाई जिताए । आलोपालो भयो । जनमतलाई सबैले स्वीकार गरेर अगाडि बढ्नुपर्छ,’ शर्माले भने ।

शर्माले अब निवर्तमान मेयरसँग पनि सहकार्य गरेर नगरको योजनावद्ध विकासमा अगाडि बढ्ने बताए । 

रूपन्देहीकै सियारी गाउँपालिकामा ५ वर्षअघि २०७४ सालमा एमालेका अयोध्या थारूले कांग्रेसका थानेश्वर घिमिरेलाई ६५२ मतान्तरले पराजित गरेका थिए । त्यो बेला थारु निर्वाचित हुँदा ६ हजार ५२ मत आएको थियो भने घिमिरेले ५ हजार ४०० पाएका थिए । 

अहिले पनि उनै थारू र घिमिरेबीच प्रतिस्पर्धा भयो । अहिले फेरि उनै निवर्तमान मेयर थारूलाई घिमिरेले २ हजार ७७७ मतान्तरले पराजित गरे । घिमिरेले १० हजार ४५ मत ल्याउँदा थारुले ७ हजार २६८ मत मात्र ल्याउन सके ।

उपाध्यक्षमा दोहोरिएर एमालेबाट उम्मेदवार बनेकी अमृता गुरूङले पनि पराजित भइन् । अहिले एमालेसहित आफू पराजित हुनुमा धेरै ‘फ्याक्टर’ले काम गरेको थारू बताउँछन् । 

थारूले भने, ‘गृहमन्त्री आएर यहीँ बसेर जनतालाई अनेक प्रलोभन देखाए । गठबन्धनले पनि त्यसैमा बल थप्यो । त्यस्तै एमालेभित्र पनि अन्तर्घातले गर्दा पराजय भोग्नुपर्‍यो ।’ उनले मतपरिणामको छिट्टै समीक्षा गरेर पार्टी अगाडि बढ्ने बताए । 

प्यूठानको माण्डबी गाउँपालिकामा ५ वर्षअघि एमालेका श्रीधर रोकाले माओवादी केन्द्रका तत्कालीन उम्मेदवार नवराज अधिकारीलाई १२ मतले पराजित गरेका थिए । २०७४ सालमा रोकाले १ हजार ७५३ मत ल्याउँदा अधिकारीले १ हजार ७४१ मत पाएका थिए । अहिले पनि फेरि उनै रोका र अधिकारीबीच नै माण्डबीमा प्रतिस्पर्धा भयो । यसपटक रोकालाई अधिकारीले २६५ मतले पराजित गरे । अधिकारीले ३ हजार ६७६ र रोकाले ३ हजार ४१९ मत ल्याए ।

प्यूठानकै नौबाहिनी गाउँपालिकामा नेपाली कांग्रेसका शिवराज रिजालले २०७४ सालमा एमालेका दिलबहादुर थापालाई ९५१ मतले पराजित गरेका थिए । त्यो बेला रिजालको ५ हजार ५२६ र थापाको ४ हजार ५७५ मत पाएका थिए । अहिले पनि जित्ने दाउमा रहेका रिजाललाई उनै रिजाललाई दिलबहादुरले ८८४ मतले पराजित गरे । थापाले ६ हजार ५३६ र रिजालले ५ हजार ६६२ मत ल्याए । यहाँ पनि सत्तारुढ गठबन्धन एकठाउँमा र एमाले एक्लै प्रतिस्पर्धा गरेका थिए ।

यसअघिको निर्वाचनमा पराजय भोगेकाले यसपटक जीत निकालेका छन् । प्यूठानमा अघिल्लोपटक झिमरुक गाउँपालिकामा राष्ट्रिय जनमोर्चाका तिलक जीसीसँग पराजित भएका माओवादी केन्द्रका पीतबहादुर महतरा क्षेत्री यसपालि ५ हजार ९२९ मतका साथ विजयी भएका छन् ।

दाङको लमही नगरपालिकामा अघिल्लोपटक पराजय भोगेका कांग्रेसका जोगराज चौधरी यसपालि निर्वाचित भएका छन् । माओवादी केन्द्रका उम्मेदवार बसन्तराज शर्मालाई २ हजारभन्दा बढी मतान्तरले पछि पार्दै उनी निर्वाचिन भएका छन् ।

बुटवल उपमहानगरपालिकामा यसअघि पराजय भोगेका कांग्रेसका खेलराज पाण्डे यसपालि निर्वाचित भएका छन् । उनले एमालेका बाबुराम भट्टराईलाई झण्डै ८ हजार मतान्तरले पराजित गरेर बुटवलमा २५ वर्षपछि कांग्रेसको साख फर्काएका छन् ।