नेकपा एमालेका अध्यक्ष केपी शर्मा ओलीले पार्टीभित्रैको अन्तर्घातका कारण स्थानीय तहको चुनावमा पार्टी पराजित भएको बताएका छन् । 

बुधवार बानेश्वरस्थित संसद भवनमा बसेको एमाले संसदीय दलको बैठकलाई सम्बोधन गर्दै ओलीले चुनावमा उपमेयर र सदस्यलाई भोट हाल्ने तर मेयरलाई भोट नहाल्ने प्रवृत्ति देखापरेको बताएका थिए ।

ओलीले बैठकमा निर्वाचन शान्तिपूर्ण, धाँधलीरहित, निष्पक्ष हुनुपर्नेमा त्यसको ठीकविपरीत भएको निष्कर्ष सुनाएको बैठकमा सहभागी एमालेका केन्द्रीय सदस्य तथा सांसद शेरबहादुर तामाङले बताए ।

‘चुनाव निष्पक्ष भएन । सत्तापक्षले एकतर्फीरुपमा खोसेको जस्तो भयो । यद्यपि जनताले दिएको लोकप्रिय मतको आधारमा एमाले अहिले पनि पहिलो पार्टी नै छौं, आगामी निर्वाचनमा पहिलो पाटी नै बन्छौं,’ ओलीलाई उद्धृत गर्दैै तामाङले भने । 

महानगर र उपमहानगरमा एमाले हार्नुमा आन्तरिक कारण मुख्य रहेको पनि ओलीले बैठकमा बताएका छन् । 

‘उपमेयरसहित सेटमा भोट हाल्ने तर मेयरमा भोट नहाल्ने अवस्था देखियो । नेतृत्वमा भोट नहाल्ने प्रवृत्ति चाहिँ एमालेमा खतरनाक रुपमा देखिएको र त्यसलाई गम्भीर रुपमा समीक्षा गर्नुपर्ने भएको अध्यक्षले बताउनुभयो,’ तामाङले भने ।

यसबारेमा तथ्यांक संकलनका लागि फर्म्याट नै बनाएर वडा कमिटीसम्म पठाइसकेको उनले बताए । 

धैरै ठूलो घेराबन्दीका बीचमा पाएको नतिजा सन्तोषजनक नभए पनि आगामी निर्वाचनबाट एमाले पहिलो दल बन्ने गरी एकजुट भएर लाग्नुपर्ने ओलीले बताएका छन् । 

त्यसबाहेक ओलीले संसद् बैठकमा व्यवस्थित र तर्कयुक्तरुपमा नीति तथा कार्यक्रमको चिरफार गर्न निर्देशन ओलीले एमाले सांसदलाई निर्देशन दिएका छन् । 

सरकारले नीति समावेश नगरेर कार्यक्रम मात्रै ल्याएको र त्यो पनि अहिलेको देशको अवस्था झल्किने प्रकृतिको नभएको ओलीको टिप्पणी गरेको एमाले नेता तामाङले बताए ।

नीति तथा कार्यक्रमबाट गठबन्धनले नयाँ भिजन दिन नसकेको, गोलमटोल ढंगले आएको ओलीले बताएका छन् ।