नेपाली कांग्रेसका नेता मीनेन्द्र रिजालले स्थानीय तह निर्वाचनमा व्यहोरेको पराजय स्वीकार गर्न एमाले अध्यक्ष केपी शर्मा ओलीलाई सुझाव दिएका छन् । कांग्रेसप्रति कुण्ठा पोख्नभन्दा आफ्नो अनुहार हेर्न उनले आग्रह गरे । 

शुक्रवार बसेको प्रतिनिधि सभाको बैठकमा सरकारका नीति तथा कार्यक्रममाथिको छलफलमा भाग लिँदै कांग्रेस नेता रिजालले चुनावमा व्यहोरेको पराजय स्वीकार गर्न ओलीलाई सुझाव दिएका हुन् । 

‘राष्ट्रपतिले दुई घण्टामा वाचन गरेको नीति तथा कार्यक्रमप्रति प्रतिपक्षी दलका नेताले टिप्पणी गर्न ३ घण्टा लगाउनु भयो । उहाँले सीट संख्यामा हारे पनि लोकप्रिय मत बढी छ भन्नुभयो । कांग्रेस एक्लै प्रतिस्पर्धा गर्न नसक्ने भनेर पनि भन्नुभयो,’ रिजालले भने, ‘माओवादीको बुई चढेर चुनाव जित्नुभयो तर सरकार बन्यो टिकाउन सक्नु भएन, जसको बुई चढेर चुनाव लड्नु भयो उनीहरूलाई सम्मान गर्न नसकेपछि कसरी सरकार टिक्थ्यो ? आफ्नो पार्टी टिकाउन सक्नु भएन, त्यसैले आफ्नो अनुहार रुप हेरे हुन्छ । कुण्ठा नपोख्नुस् । यसपालिको हारलाई स्वीकार्नुस न, अनि आउने चुनावको तयारी गर्न सजिलो हुन्छ ।’