माओवादी नेता तथा पूर्वशिक्षामन्त्री गिरिराजमणि पोखरेलले तत्कालीन प्रधानमन्त्री केपी शर्मा ओलीले नै लिपुलेक र कालापानीबारे लेखिएको नक्शासहितको पुस्तक छाप्न रोकेको बताएका छन् । 

तत्कालीन ओली सरकारको शिक्षामन्त्री रहेका बेला आफूले पुस्तक ल्याउन खोजे पनि ओलीले रोकेको उनले बताएका हुन् । 

‘म शिक्षामन्त्री हुँदा तयार गरेको लिपुलेक र कालापानीसम्बन्धी पुस्तकलाई उहाँ (ओली)ले रोक लगाउनुभयो । एउटा कार्यदल बनाउनुभयो । एक पटक पनि बैठक राख्नुभएन,’ शनिवारको संसद बैठकमा बोल्दै पोखरेलले भने, ‘किताब किन रोक्नुभयो जवाफ पनि दिनुभएन । साँच्चै प्रजातन्त्र र राष्ट्रियताको कठघरामा तपाईं (ओली) पनि हुनुहुन्छ ।’

बिहीवारको संसदको बैठकमा एमाले अध्यक्ष तथा पूर्वप्रधानमन्त्री ओलीले राष्ट्रियताबारे लामो व्याख्या गरेका थिए । 

राष्ट्रियता र कूटनीतिलाई राजनीतिक दाउपेचको विषय बनाउन नहुने उनले बताए ।

‘राष्ट्रिय भावनाको कुरा गर्दा नीति तथा कार्यक्रमले लिपुलेक, कालापानी र लिम्पियाधुरालाई छोडेको छ, खुट्टा नकमाउनुस्,’ उनले भने, ‘चीनलाई सशंकित बनाएर नेपाललाई अमेरिकी कित्तामा लगेर राख्दैमा नेपालको राष्ट्रिय हित हुँदैन ।’