युक्रेनमाथि रुसले आक्रमण गरेपछि पश्चिमले रुसमाथि लगाएको प्रतिबन्ध पूर्णतया विफल भएको छ । 

रुसी मुद्रा रुबल डलर र युरोको तुलनामा पहिलेभन्दा बलियो भएको छ अनि तेल र ग्यासको बिक्रीबाट रुसले यो वर्ष पोहोर सालभन्दा बढी कमाइरहेको छ । 

त्यसैले रुसमाथिको प्रतिबन्ध पश्चिमले हटाउन सक्ने सम्भावना बढेको कतिपय विश्लेषकहरूले अनुमान गरेका छन् । 

प्रतिबन्ध नहटाएमा आगामी जाडो महिनामा युरोप दयनीय अवस्थामा पुग्नेछ । अहिले नै ग्यासको भाउ बढेकाले मानिसहरूलाई गाह्रो पर्न थालेको छ । खाद्यसामग्रीहरू सजिलै पाइन छाडेका छन् र तिनको मूल्य पनि आकासिएको छ । 

कामकाजी वर्गका हजारौं युरोपेलीहरूले सरकारबाट प्राप्त खाद्यान्न सहुलियत कार्ड उपयोग गर्नुपरेको छ । उनीहरूको तलब चाहिँ बढेको छैन । पश्चिमी लोकतन्त्रप्रतिको अनास्था बढ्दै गएको छ ।

अमेरिकी समाज भड्खालोतर्फ बढिरहेको छ । गरीबी, हिंसा, अतिवादीकरण र कोभिड संक्रमण झन् झन् बढिरहेका छन् । सरकारले मानिसहरूलाई कोभिड राहतका लागि दुई हजार डलर दिने भनेको पनि पुरानो सपना जस्तो भइसकेको छ । 

युक्रेनले युद्ध हारिरहेको पश्चिमी नेताहरूले स्वीकार गर्न थालेका छन् । बेलायतका प्रधानमन्त्री बोरिस जोनसनले डोनबास क्षेत्रमा रुसले सुस्त भए पनि प्रगति गरिरहेको बताएका छन् । आफूहरूको झूटो प्रचारबाजी विफल भएको थाहा पाएका पश्चिमाहरू युक्रेनबाट ध्यान हटाएर सिन्च्याङतर्फ केन्द्रित गर्न खोजिरहेका छन् । 

पश्चिम एसियामा पश्चिमको सेवक राष्ट्र इजरायलले दिनदहाडै पत्रकारहरूको हत्या गरेको छ । प्यालेस्टाइनीहरूको प्रतिकार दिनदिनै बलियो बन्दै गएको छ । 

पश्चिमले अब विश्राम लिएर आफ्नो अवस्थाका बारेमा सोच्न ढिलो भइसकेको छ । त्यसैले रुसमाथिको प्रतिबन्ध सुटुक्क हटाएर युरोपलाई राहत दिने सोच अमेरिकाले बनाएको हुन सक्छ ।