कागेश्वरी मनोहरा नगरपालिकाको कार्यपालिका निर्वाचन जेठ १९ गते हुने भएको छ ।

निर्वाचन अधिकृत शारदा राउतका अनुसार निर्वाचनका लागि मतदाता नामावली प्रकाशन, उम्मेदवारी दर्ता र अन्तिम नामावली प्रकाशन सम्पन्न भएको छ ।

कार्यपालिका निर्वाचनका लागि नेपाली कांग्रेस र नेकपा एमालेले उम्मेदवारी दर्ता गराएका छन् । वैशाख ३० गतेको निर्वाचनमा कांग्रेस र नेकपा माओवादी केन्द्रबीच गठबन्धन भएकाले ८ जना कार्यपालिका सदस्यमध्ये १ जनामा माओवादीको पनि उम्मेदवारी परेको छ ।

९ वडा रहेको नगरपालिकाको कार्यपालिका निर्वाचनका लागि ४७ जना मतदाता छन् । निर्वाचित नगर प्रमुख, उपप्रमुख, ९ वडाध्यक्ष, महिला सदस्य, दलित महिला सदस्य र खुला सदस्य गरी ४७ जना मतदाता रहेको नगर निर्वाचन कार्यालयले जनाएको छ । 

कार्यपालिकाको महिला सदस्य निर्वाचित मध्येबाटै हुने व्यवस्था छ । दलित तथा अल्पसंख्यक सदस्य भने नगरपालिकाको मतदाता नामावलीमा नाम रहेकामध्येबाट उम्मेदवारी दिई निर्वाचित हुनुपर्ने व्यवस्था रहेको छ ।

नगरपालिकाको नगर प्रमुखमा कांग्रेसका उपेन्द्र कार्की, उपप्रमुखमा एमालेकी शान्ता थापा विजयी भएका छन् । वडा नम्बर १, ३, ४ एमालेले जितेको छ । कांग्रेसले वडा नम्बर २, ५, ७, ८ र ९ जितेको छ । वडा नम्बर ६ मा भने नेकपा एकीकृत समाजवादीका प्रकाश फुयाँल विजयी भएका छन् ।