पूर्वअर्थमन्त्री तथा नेकपा(एमाले)का सांसद सुरेन्द्रप्रसाद पाण्डेले कर्मचारीको तलब १५ प्रतिशतका दरले समान रुपमा बढ्नु न्यायोचित नभएको बताएका छन् । 

बुधवारको प्रतिनिधि सभा बैठकमा बोल्दै सांसद पाण्डेले महँगीको हिसाबमा कर्मचारीको तलब १५ प्रतिशतले वृद्धि हुने ठिकै भए पनि सबै वर्गका कर्मचारीहरूको समान रुपमा तलब वृद्धि हुनु न्यायोचित नभएको बताएका हुन् । 

‘तल्लो वर्गका कर्मचारीहरू र माथिल्लोले एउटै दरमा प्राप्त गर्दा यो न्यायोचित भयो त ? यो समाजवादउन्मुख भयो ?,’ उनले भने, ‘विगतमा यस ढंगले हामीले गर्ने गर्दथ्यौँ ? कहीँ पनि म त्यो देख्दिनँ । यो न्यायोचित वितरण त भएन होला ।’ 

सांसद पाण्डेले वृद्धभत्ता ६८ वर्षमै दिए पनि एमालेले स्याबासी पाउने बताए । साथै उनले ६० लाख परिवारलाई इन्डक्सन चुल्हो दिने कुरामा अनुचित लाभ लिने स्वार्थ लुकेको पनि बताए । 

उनले शिक्षा र स्वास्थ्यको क्षेत्रमा बजेट कटौती भएकोप्रति असन्तुष्टि व्यक्त गरे ।