आफ्नो पी–८ मेरिटाइम सर्भेलान्स विमानलाई चीनको जे–१६ लडाकू विमानले पिछा गरेको आरोप अस्ट्रेलियाले लगाएपछि चीनको प्रतिक्रिया आएको छ । 

दक्षिण चीन सागरमा रहेको पारासेल आइल्यान्ड्सको आकाशमा उक्त गुप्तचरी विमान उडाएर आफ्नो सार्वभौमसत्तालाई उल्लंघन गरेको भन्दै चीनले अस्ट्रेलियाको आलोचना गरेको हो ।

‘चिनियाँ जनमुक्ति सेनाको सदर्न थिएटर कमान्डले अस्ट्रेलियाको एन्टी सबमरिन वारफेयर विमानलाई पहिचान गरी त्यहाँबाट जानका लागि चेतावनी दिन आफ्नो लडाकू विमान पठाएको थियो । अस्ट्रेलियाको विमान मे २६ मा चिनियाँ सेनाको चेतावनीका बावजूद सिशा आइल्यान्ड्स (पारासेल) मा चिनियाँ वायुक्षेत्रमा प्रवेश गरेको थियो,’ चिनियाँ रक्षा मन्त्रालयका प्रवक्ता कर्नेल टान केफेले मंगलवार बताए । 

चीनले लगभग पूरै दक्षिण चीन सागरमाथि सार्वभौमसत्ताको दाबी गरेको छ । 

अस्ट्रेलियाको विमानलाई चिनियाँ विमानले इन्टरसेप्ट गर्दा खतरनाक स्थिति आएर विमान तथा कर्मचारीको सुरक्षा जोखिममा परेको भन्ने अस्ट्रेलियाको दाबीलाई टानले खारेज गरे । 

घटनाका विषयमा अस्ट्रेलियाले गलत सूचना फैलाएको र भिडन्तको हौवा फैलाएको उनको भनाइ छ । 

आइतवार (५ जुन) मा एक प्रेस विज्ञप्ति प्रकाशन गरी अस्ट्रेलियाको रक्षा मन्त्रालयले चिनियँ समकक्षीहरूसँग यो कुरा उठाएको बताए । 

आफूले अन्तर्राष्ट्रिय कानूनको पालना गर्दै आवागमन स्वतन्त्रताको अधिकारका साथ अन्तर्राष्ट्रिय जल तथा वायुक्षेत्रमा उडान गरिरहेको अस्ट्रेलियाको भनाइ छ ।