प्रमुख प्रतिपक्षी दल नेकपा एमालेले प्रधानन्यायाधीश चोलेन्द्र शमशेर जबरा विरुद्धको महाअभियोग प्रस्ताव अगाडि बढाउन माग गरेको छ ।

बुधवार बसेको प्रतिनिधि सभा बैठकको शून्य समयमा एमाले स्थायी कमिटी सदस्य समेत रहेका सांसद खगराज अधिकारीले महाअभियोग प्रस्ताव अगाडि बढाउन माग गरेका हुन् । 

‘महाअभियोगको प्रस्ताव असरल्ल पार्न ल्याएको हो कि फैसला गर्न ल्याएको हो ? त्यो तुरुन्त अगाडि बढाइयोस् । जोडदार माग गर्न चाहन्छु,’ अधिकारीले भने ।  

नेकपा एमालेले मंगलवार बसेको प्रतिनिधि सभा कार्यव्यवस्था परामर्श समितिको बैठकमा पनि महाअभियोग प्रस्ताव अगाडि बढाउन माग गरेको थियो । पदीय आचरण विपरीतको काम गरेको भन्दै नेपाली कांग्रेस, नेकपा माओवादी केन्द्र लगायत प्रतिनिधि सभाका ९८ सांसदले फागुन १ गते चोलेन्द्रविरुद्ध महाअभियोग प्रस्ताव संसदमा दर्ता गरेका थिए ।

महाअभियोग प्रस्तावबारे छानबिन गर्न प्रतिनिधि सभाले ढिलो गरी फागुन २२ गते समिति बनाए पनि प्रस्ताव समितिमा गएको छैन । समितिमा एमालेका ४, कांग्रेस र माओवादीका २–२ तथा नेकपा एस, जसपा र लोसपाका १–१ सदस्य छन् ।

समिति गठन गरेको ३ महिनाभित्र महाअभियोगबारे सिफारिस गर्नुपर्ने प्रतिनिधि सभा कार्यसञ्चालन नियमावलीको व्यवस्था छ । महाअभियोग दर्ता भएको आगामी सोमवार ३ महिना पुग्दैछ । 

प्रमुख प्रतिपक्षी दल नेकपा एमाले सहमत नहुँदा महाअभियोगको प्रस्ताव अगाडि बढ्न सकेको छैन । महाअभियोग पारित गर्न संसदमा दुईतिहाइ बहुमत आवश्यक पर्छ । महाअभियोग प्रस्ताव दर्ता भएसँगै प्रधानन्यायाधीश जबरा निलम्बनमा परेका छन् ।