नेकपा एमालेका सांसद नारायण खतिवडाले स्थानीयको जायज माग पूरा गरेर मात्र नुवाकोटमा फोहोर व्यवस्थापन गर्न सरकारको ध्यानाकर्षण गराएका छन् । 

बिहीवार बसेको प्रतिनिधि सभा बैठकको शून्य समयमा नुवाकोट २ का सांसद खतिवडाले फोहोर व्यवस्थापनको नाममा नुवाकोटका जनतामाथि प्रहरी दमन गरिएको भन्दै आपत्ति जनाएका हुन् । 

‘जेठ महिनाको २४ र २५ गते नुवाकोटको ककनी र धादिङको धुनीबेसीको बीचमा रहेको बञ्चरेडाँडामा फोहोर व्यवस्थापन गर्ने निहुँमा नुवाकोटे जनतामाथि प्रहरी दमन भएको छ । स्थानीय तहको चुनावमा चुनाव चिन्ह रहेको लौरो नुवाकोटे जनताको टाउको र ढाडमा बजारिन पुगेको छ,’ खतिवडाले भने, ‘फोहोर व्यवस्थापनको नाममा १७ वर्षदेखि जुन बेथिति भएको छ, स्थानीय जनताको जायज माग सुनेर फोहोर व्यवस्थापन गर्ने काम होस् ।’