भेनेजुएलाका राष्ट्रपति निकोलास मदुरो र उनका इरानी समकक्षी इब्राहिम रईसीले विभिन्न क्षेत्रमा २० वर्षसम्म सहकार्यका लागि सम्झौता गरेको एएफपी समाचार संस्थाले खबर दिएको छ । 

यी दुई देशबीच भएको नयाँ सहमतिको विस्तृत विवरण सार्वजनिक गरिएको छैन । 

इरान भ्रमणमा रहेको मदुरोसँग कृषि, प्रविधि, तेल, सञ्चार, पर्यटन र यातायात क्षेत्रका अधिकारीहरू पनि छन् । त्यसैले दुई मुलुकले विभिन्न क्षेत्रमा सहकार्यका लागि योजना बनाइरहेको देखिन्छ । 

इरान र भेनेजुएला दुवै अमेरिकाले लगाएको कठोर प्रतिबन्धका पीडित हुन् । 

मदुरोले इरानसँग मिलेर प्रतिबन्धरूपी युद्धको सामना गर्ने तथा त्यसलाई विफल बनाउनका लागि उपाय खोज्ने बताएका छन् । अन्तर्राष्ट्रिय विषयमा दुई देशले साझा भिजन बनाउने पनि मदुरोको भनाइ छ ।