प्रधानमन्त्री शेरबहादुर देउवाले बजेट पारित भएलगत्तै नागरिकतासम्बन्धी विधेयक संसदमा ल्याउने बताएका छन् । लोकतान्त्रिक समाजवादी पार्टी (लोसपा)का अध्यक्ष महन्थ ठाकुर, वरिष्ठ नेता राजेन्द्र महतो, शरतसिंह भण्डारीसहितका शीर्ष नेताहरू आज बिहान प्रधानमन्त्री निवास बालुवाटारमा भेट गर्न जाँदा प्रधानमन्त्री देउवाले उक्त आश्वासन दिएका हुन् । 

भेटवार्तामा सहभागी लोसपाका वरिष्ठ नेता महतोका अनुसार बजेट पारित भएलगत्तै नागरिकतासम्बन्धी विधेयक संसदमा दर्ता गराउने भनेर प्रधानमन्त्री देउवाले आश्वासन दिएका थिए । 

'नागरिकता विधेयक संसदमा ल्याउने कुनै सुरसार छैन, विधेयक नल्याए संसद अवरुद्ध गरेर बजेट पारित हुन दिन्नौं भनेर हामीले उहाँलाई चेतावनी दिएका थियौं,' महतोले लोकान्तरसँग भने, 'त्यसपछि उहाँले बजेट पारित भएलगत्तै नागरिकता विधेयक पारित गर्ने आश्वासन दिनुभयो ।'

मधेश आन्दोलनका समयमा आन्दोलनकारीमाथि लगाइएका मुद्दा फिर्ताको सन्दर्भमा पनि सरकारको तर्फबाट संचार तथा सूचना प्रविधि मन्त्री ज्ञानेन्द्रबहादुर कार्की र लोसपाको तर्फबाट सांसद लक्ष्मणलाल कर्णसहितको कार्यदलले होमवर्क गरिरहेको देउवाले बताएका थिए । 'मुद्दा फिर्तासम्बन्धी गृहकार्य भइरहेको छ, छिट्टै मुद्दा फिर्ता पनि हुन्छ भनेर उहाँले प्रतिबद्धता व्यक्त गर्नुभयो,' महतोले भने ।

त्यसै गरी पाँच दलीय सत्ता गठबन्धनमा सहभागी हुन प्रधानमन्त्री देउवाले आजको भेटमा पनि प्रस्ताव गरेको उनको भनाइ छ । 'लोसपा गठबन्धन गर्नका लागि खुल्ला रहेको तर सरकार पक्षीय पाँच दलीय गठबन्धन बनेकै हुनाले के आधारमा गठबन्धन बन्ने हो त्यसको रुपरेखा तथा अवधारणा सरकारबाट आउनुपर्ने हामीले भन्यौं,' महतोले थपे, 'पहिला सत्ता पक्षबाट कन्सेप्ट आओस् त्यसपछि हामी विचार गर्छौं भनेर जवाफ दियौं ।' 

गठबन्धनका लागि प्रधानमन्त्रीबाट ठोस् जवाफ नआएको उनले खुलाए । लोसपा कांग्रेस वा एमालेमध्ये जुनसुकै दलसँग पनि गठबन्धन गर्न खुला रहेको उनको भनाइ छ ।