लुम्बिनी प्रदेश सभाको प्रमुख प्रतिपक्ष दल नेकपा एमालेले स्वास्थ्य राज्यमन्त्री विमला वलीलाई तत्काल मन्त्री पदबाट बर्खास्त गर्न माग गरेको छ । 

एमाले लुम्बिनी प्रदेश सभा संसदीय दलका उपनेता बैजनाथ चौधरीले राज्यमन्त्री वलीले अनुशासनहीन चरित्र देखाएको भन्दै तत्काल बर्खास्त गर्न माग गरेका हुन् । 

‘विमलाले प्रदेश सभा, सरकार र प्रदेशकै बेइज्जत हुने काम गर्नुभयो,’ नेता चौधरीले लोकान्तरसँग भने, ‘मुख्यमन्त्री कूलप्रसाद केसीले तत्काल उहाँ (वली) लाई मन्त्री पदबाट बर्खास्त गर्न आग्रह गर्दछु् ।’ 

पूर्वमन्त्री समेत रहेका नेता चौधरीले थपे, ‘उहाँको कदमले हामी सबैको शिर निहुर्‍याउने काम भयो । यस्ता पात्रलाई मन्त्री बनाइराख्न हुँदैन । सरकारले तत्काल यो विषयमा निर्णय गर्नुपर्छ ।’ 

सरकारका प्रवक्ता तिलकराम शर्माले विमलाको विषयमा अध्ययन गरेर निचोडमा पुग्ने बताएका छन् । 

वली दाङको तुलसीपुरबाट मंगलवार पक्राउ परेकी छन् । एकराज बस्नेतको घरमा बिहानै प्रवेश गरी बस्नेतकी पत्नी मीना भण्डारी र उनकी छोरीलाई हातपात गरी तोडफोडमा उत्रिएकी थिइन् । उनको उदण्ड कार्य देखेपछि स्थानीयले नियन्त्रणमा लिएर प्रहरीलाई बुझाएका थिए । वली अहिले इलाका प्रहरी कार्यालय तुलसीपुरको नियन्त्रणमा छिन् ।

यो पनि पढ्नुहोस्

राज्यमन्त्री वलीले ‘प्रेमी’ भनिएका व्यक्तिको घरमा आतंक मच्चाएपछि...