कलाकार दीपकराज गिरी र दीपाश्री निरौलाको मुख्य भूमिका रहेको ‘तीतो सत्य’ टेलिसिरियलमा बाल कलाकारको भूमिका निर्वाह गरेर चर्चित बनेका कलाकार राज आचार्य र अभिनेत्री सुनिशा बजगाईं वैवाहित सम्बन्धमा बाँधिएका छन् ।

उनीहरूले मंगलवार रातोपुलस्थित शिवम् पार्टी प्यालेसमा परम्पराअनुसार विवाह गरेका हुन् ।

विवाहमा दुवैको परिवार, निकट आफन्त र केही कलाकर्मीको उपस्थिति रहेको छ ।

विदेशमा चार्टर्ड अकाउन्टेन्टको पढाइ सकेर आएका राज र ‘इन्टुमिन्टु लण्डनमा’ चलचित्रकी अभिनेत्री सुनिशा केही वर्षदेखि प्रेम सम्बन्धमा थिए । सुनिशा कलेज नेपालमा अभिनय गर्दै केही म्युजिक भिडियोमा समेत अभिनय गरेकी छन् । अभिनेता राज भने उमेर बढेसँगै अभिनयबाट टाढा हुन पुगेका थिए । 

उनले केही म्युजिक भिडियोमार्फत आफ्नो कलायात्रा अगाडि बढाउने प्रयास गरे पनि सफल हुन सकिरहेका छैनन् ।