सर्वोच्च अदालत बार एशोसिएसनले न्यायाधीश-वकिल घुस डील प्रकरणको छानबिन गर्न माग गरेको छ ।

सर्वोच्च अदालत बार एशोसिएसनका सचिव ऋषिराम घिमिरेद्वारा जारी विज्ञप्तिमा काठमाडौं जिल्ला अदालतका न्यायाधीश राजकुमार कोइराला र अधिवक्ता रुद्रप्रसाद पोखरेलबीच भएको घुस डील प्रकरण संवादको छानबिन गर्न माग गरिएको छ । 

उक्त रेकर्डेड संवादले न्यायालय र कानून व्यवसायमाथि नै आघात पुर्‍याएको हुँदा सो विषयमा गम्भीर ध्यानकर्षण भएको विज्ञप्तिमा जनाइएको छ । 

'सो घटनाको यथाशीघ्र छानबिन गरी सत्यतथ्य पत्ता लगाई उक्त अवाञ्छित, अमर्यादित र अनुचित कार्यमा संलग्न सम्पूर्ण व्यक्तिप्रति आवश्यक कारवाहीका लागि सम्बन्धित निकाय समक्ष यो बार एशोसिएसन हार्दिक आग्रह गर्दछ,' विज्ञप्तिमा उल्लेख छ।

उक्त घटनाको छानबिनबाट उचित निकास नआएसम्म यो संवादमा उल्लेख भएका विवादित व्यक्तिहरूलाई आ-आफ्नो जिम्मेवारीबाट अलग राख्न समेत माग गरिएको छ ।