गाउँ विकास समितिको सचिवले सामान्य जीवनयापन गर्न पनि मुस्किल हुने गरेको ठाउँमा करोडौंको लगानी गरी अस्वाभाविक साम्राज्य स्थापना गरेको भेटिएको छ ।

धनुषामा लामो समय गाविस सचिव रहेका जनकपुरधाम उपमहानगरपालिका–२० देवपुरा रुपैठा घर भएका गाविस सचिव गणपति झा अकुत सम्पत्ति आर्जन गरी आलिसान जीवन जिउँदै आएका छन् ।

नायब सुब्बाबाट अवकाश पाएका उनले जनकपुरमा विभिन्न कित्तामा महंगो जग्गा जमिन किन्नुका साथै १ करोड रुपैयाँभन्दा बढीको लागतमा आलिसान घर नै बनाएका छन् ।

जेसीबी, स्कार्पियो, बोलेरो, ट्रयाक्टर सहितका करोडौं लगानीमा सवारीसाधन खरिद गरेका झाले विभिन्न ३ वटा व्यावसायिक फर्महरू समेत सञ्चालन गर्दै आएका छन् ।

अख्तियार दुरुपयोग अनुसन्धान आयोगले उनीविरुद्ध २ करोड ४४ लाख ७१ हजार १०५ रूपैयाँको स्रोत नखुलेको सम्पत्ति भन्दै बिगो कायम गर्दै बुधवार विशेष अदालत काठमाडौंमा आरोपपत्र दायर गरेको छ । झा २०३९ मंसिर ९ गते गाविस सचिव पदबाट सार्वजनिक सेवामा प्रवेश गरेर २०७८ साउन महिनामा अवकाश पाएका थिए ।

जिल्ला प्रशासन कार्यालय धनुषाको नायब सुब्बाबाट अवकाश पाएका झाविरुद्ध अख्तियारले भ्रष्टाचारको मुद्दा दर्ता गरेको छ ।

आयोगका अनुसार २०३९/४० देखि २०७७/७८ सम्मको समग्र आय–व्यय हेर्दा २ करोड ४२ लाख ६७ हजार १०४ रुपैयाँ देखिएको छ तर व्ययतर्फ जग्गा खरिद, ऋणको सावाँब्याज, गाडीहरू, घर, अध्ययन खर्च लगायत गरेर ४ करोड ८७ लाख ३८ हजार २१० रूपैयाँ हुन आएको छ । अख्तियारका अनुसार २ करोड ४४ लाख ७१ हजार १०५ रुपैयाँको स्रोत खुलेको छैन ।

झाले गैरकानूनी रूपमा आर्जन गरेको सम्पत्ति पत्नी मीनादेवी र छोराहरूको नाममा राखेको छ । आयोगका अनुसार पत्नी मीनादेवी, छोराहरू दिवाकर, शिवाकर र करुणाकरलाई समेत प्रतिवादी बनाएर आरोपपत्र दायर गरिएको छ । 

आयआर्जन तथा खर्चको यस्तो छ विवरण -

आयआर्जनतर्फ पारिश्रमिक बचतबाट २५ लाख २९ हजार रुपैयाँ, जग्गा बिक्रीबाट १२ लाख ८५ हजार रुपैयाँ, विभिन्न बैंक तथा कर्मचारी सञ्चय कोषबाट १ करोड ६८ लाख ४९ हजार रुपैयाँ ऋण लिएको देखिन्छ । कृषि आयबाट ९ लाख ३२ हजार रुपैयाँ, सवारीसाधन आयबाट १८ लाख ४८ हजार रुपैयाँ, बीमा रकम १ लाख ९० हजार रुपैयाँ आय आर्जन गरेको देखिन्छ ।

न्यू थ्री ब्रदर एण्ड बिल्डर्स नामको फर्मबाट ३ लाख ६१ हजार रुपैयाँ, जग्गाको मुआब्जाबाट २ लाख ७० हजार रुपैयाँसहित गरेर झाको जम्मा आय २ करोड ४२ लाख ६७ हजार १०४ रुपैयाँ मात्र हुन्छ तर झाको खर्च तथा लगानी ४ करोड ८७ लाख ३८ हजार २१० रुपैयाँ देखिएको छ ।

जनकपुरसहित विभिन्न ठाउँमा विभिन्न कित्ता जग्गा खरिद गरेबापत ३७ लाख ८८ हजार रुपैयाँ, विभिन्न बैंकबाट लिएको ऋणको साँवा ब्याज भुक्तानीबापत ८० लाख ६५ हजार रुपैयाँ खर्च गरेको देखिन्छ ।

विभिन्न किसिमका सवारीसाधन खरिदमा पनि उनले झण्डै २ करोड हारहारीमा खर्च गरेको देखिन्छ । जेसीबी, स्कार्पियो, बोलेरो, ट्रयाक्टर सहितका सवारीसाधन खरिदमा १ करोड ८९ लाख ६३ हजार रुपैयाँ खर्च गरेको देखिन्छ । बिमा भुक्तानीमा १ लाख ५२ हजार रुपैयाँ, बैंक मौज्दात १० लाख ६२ हजार रुपैयाँ, घर निर्माणमा १ करोड १३ लाख २६ हजार रुपैयाँ, छोराछोरीको अध्ययन खर्च भुक्तानीमा ९ लाख ३ हजार रुपैयाँ खर्च गरेको देखिन्छ ।

करुणाकर इन्टरप्राइजेज, न्यू थ्री ब्रदर्स एण्ड बिल्डर्स र नीति कन्सट्रक्सन समेतका ३ वटा व्यावसायिक फर्मको दर्ता तथा सञ्चालनमा ३७ लाख ५० हजार रुपैयाँ खर्च गरेको देखिन्छ । यसरी हेर्दा उनको कूल खर्च तथा लगानी ४ करोड ७३ लाख ३८ हजार २१० रुपैयाँ भएको देखिन्छ । जुन आयस्रोतभन्दा २ करोड ४४ लाख ७१ हजार १०५ रुपैयाँ बढी भई स्रोत खुलेको छैन ।

झा गत वैशाख ३० गते सम्पन्न स्थानीय तहको निर्वाचनमा जनकपुरधाम उपमहानगरपालिका–२० मा स्वतन्त्रबाट वडाध्यक्ष पदमा उम्मेदवार बनेका थिए । वडाध्यक्षमा उनी पराजित भएका छन् ।