गत शुक्रबारदेखि प्रदर्शनरत सिनेमा ‘चिसो मान्छे’ कला जगतकै विशेष सिनेमा रहेको अभिनेत्री सुरक्षा पन्तले बताएकी छिन् ।

‘चिसो मान्छे’ निर्देशकले मनले आँटेको र कलाकारहरूको उम्दा प्रस्तुतिले छाँटेको सिनेमा रहेको उनको भनाइ छ ।

उनी फेसबुकमा लेख्छिन्, ‘यस्तो कथा बुनेर आफूलाई जुन दर्जाको निर्देशक भनेर प्रष्ट पार्नुभएको छ दीपेन्द्र के खनालले त्यो कसैले टिकाटिप्पणी गर्दैमा हराउनेवाला छैन । मैले ढिलो हेरेकोमा पछुतो छ ।’

उनले कलाकारहरुको अभिनयको समेत निकै प्रशंसा गरेकी छिन् । उनी अगाडि लेख्छिन्, ‘अर्पण थापा र स्वस्तिमा खड्कालाई छड्के सलाम दिन चाहन्छु, यो सुनसान कला यात्रामा यति धेरै मिठास भर्नु भएकोमा ।’

उनले चिसो मान्छे हेर्न नछुटाउन समेत आग्रह गरेकी छिन् । उनले थप लेखेकी छिन् ‘महामारीमा हामीले चिसो मान्छेलाई नजिक राख्न सकेनौँ । मैले पनि सिनेमा हेरुञ्जेल चिसो मान्छेलाई बेवास्ता नै गरेँ । कथा त्यही बेवास्ताको हो ।’

शर्मिला पाण्डेको निर्माण एवं दीपेन्द्र के. खनालको निर्देशन रहेको सिनेमा ‘चिसो मान्छे’मा स्वस्तिमा खड्का, अर्पण थापा र देशभक्त खनाल शीर्ष भूमिकामा छन् । अभिनेत्री सुरक्षाले दीपेन्द्रको निर्देशनमा ‘धनपति’ र ‘आमा’ सिनेमामा सहकार्य गरेकी छिन् । जसमध्ये ‘आमा’बाट सुरक्षाले निकै राम्रो प्रतिक्रिया पाएकी थिइन् ।