नेकपा एकीकृत समाजवादी (एस) पार्टीका अध्यक्ष माधवकुमार नेपालले सरकारमा सहभागी मन्त्रीहरूसँग छलफल गरेका छन् ।

सरकारमा सहभागी ४ मन्त्रीलाई फिर्ता बोलाउने निर्णय अलपत्र परेको समयमा नेता नेपालले ४ मन्त्रीसँग बुधवार आफ्नै निवासमा छलफल गरेका हुन् । 

स्वास्थ्य तथा जनसंख्या मन्त्री विरोध खतिवडा र श्रम मन्त्री कृष्णकुमार श्रेष्ठले पार्टी निर्णय कार्यान्वयनमा सघाउने प्रतिबद्धता जनाएका थिए । शहरी विकास मन्त्री रामकुमारी झाँक्री र संस्कृति, पर्यटन तथा नागरिक उड्डयन मन्त्रीले भने पार्टी निर्णयमा आपत्ति जनाएका छन् । 

‘हामीले राम्रो काम गरिरहेका छौं, संसदबाट बजेट पारित नहुँदै फिर्ता बोलाउने निर्णय गलत भयो,’ मन्त्री झाँक्रीको भनाइ उदृत गर्दै स्रोतले भन्यो, ‘हामीले के गलत काम गर्‍यौं र सरकारबाट फिर्ता बोलाउने ? मन्त्री फेर्ने विषय संसदीय दलमा निर्णय गर्ने कि बाहिर ?’ 

नेता नेपालले भने सरकारमा सहभागी गराउने समयमै ६ महिनाका लागि पठाएको बताएका थिए । ‘अहिले तपाईंहरूले पार्टीको निर्णय मान्नुपर्छ, पार्टी निर्णय नमान्दा पद लोलुपको आरोप लाग्छ,’ नेता नेपालले भनेका थिए । 

उनले पार्टीले निर्णय गरिसकेको अवस्थामा सहज ढंगले सरकार छाड्न आग्रह गरेका नेकपा एसका एक प्रभावशाली नेताले लोकान्तरलाई बताए ।

नेता नेपालले बुधवार बालुवाटारमा बसेको सत्ता गठबन्धनको बैठकमा पनि पार्टीले सिफारिश गरेका मन्त्रीलाई शपथ गराउन आग्रह गरेका थिए । प्रधानमन्त्री शेरबहादुर देउवाले छुट्टै कुरा गरौ भनेका थिए । 

सोही अनुसार नेता नेपालले बिहीवार देउवालाई भेटेका छन् । मन्त्री फिर्ता बोलाउने निर्णय कार्यान्वयन नहुँदा पार्टीमा समस्या भएको भन्दै नेपालले सिफारिश गरेका मन्त्रीलाई शपथ गराउन आग्रह गरेका नेकपा एस स्रोतले बतायो । 

नेता नेपालले माओवादी केन्द्रका अध्यक्ष पुष्पकमल दाहाल ‘प्रचण्ड’सँग पनि छलफल गरेका थिए । नेकपा एसले गत जेठ २२ गते सरकारका ४ मन्त्रीलाई फिर्ता बोलाएर नयाँलाई सरकारमा पठाउने निर्णय गरेको थियो ।

मन्त्रीहरूले सरकार छाड्नका लागि केही शर्त राखेका थिए । ती शर्तबारे बैठकमा छलफल गर्ने नेता नेपालले आश्वासन दिएका छन् । मन्त्री फेर्ने निर्णय कार्यान्वयन नभएकोमा एसका नेता झलनाथ खनालले आक्रोश जनाउँदै आएका छन् ।