नेपालको सीमा अतिक्रमणबारे बेलाबेला चर्चा भइरहन्छ । नेपालको संविधानमै समेटिएको लिपुलेक, लिम्पियाधुरा र कालापानी क्षेत्र अझै पनि भारतीय कब्जामै छ ।

तर भारतीय मिडियाले चीनले नेपालको भूमि हडप्न खोजेको समाचार लेखेको छ । आजतकको अनलाइन संस्करणमा गोरखा जिल्लाको हिमाली क्षेत्रमा चीनले काँडेतार लगाएको दाबी गरिएको छ ।

उत्तरी सीमा हिमाली क्षेत्रमा यकिन सीमांकन नभएकाले चीनले गोरखाको रुइलामा अतिक्रमण गर्दै नेपाली भूभागमा काँडेतार लगाएको दाबी गरिएको छ । स्थानीय छिरिङ लामाको भनाइ उदृत गर्दै समाचारमा उल्लेख छ, ‘चीनले नेपालतर्फको सीमामा काँडेतार लगाएको छ, हामीलाई त्यतातिर जान पनि प्रतिबन्ध छ ।’ चीनले नेपाली गाउँ रुइला र साम्दाको बीचमा तार लगाएको समाचारमा उल्लेख छ ।

यसअघि चीनले नेपाली सीमा अतिक्रमण गरेको खबर आएपछि सीमा क्षेत्रमा चीनबाट झन् निगरानी बढाइएको स्थानीय दावा लामाले जनाएका छन् । ‘चीनले ३ वर्षदेखि नेपालीलाई साम्दा गाउँ जान दिएका छैनन्,’ उनले भने, ‘चिनियाँ सुरक्षाकर्मीले सीसीटीभीबाट समेत निगरानी गर्ने गरेका छन् ।’

नेपालीका नातेदार आफन्तहरू अर्काे गाउँ साम्दा पनि बस्छन् तर चिनियाँ सुरक्षाकर्मीले भेटघाटका लागि समेत जान नदिने गरेको स्थानीयको दाबी छ ।