नेकपा माओवादी केन्द्रका सांसद गजेन्द्र महतले न्यायालय भ्रष्टाचारको अखडा बनेको भन्दै संसद टुलुटुलु हेरेर बस्न नहुने बताएका छन् ।

अधिवक्ता रुद्र पोखरेलले मुद्दा सेटिङका लागि न्यायाधीशसँग पैसा लेनदेन गरेको अडियो सार्वजनिक भएपछि विषय संसदमा पुगेको हो । 

बिहीवार बसेको प्रतिनिधिसभा बैठकको विशेष समयमा सांसद महतले न्यायालयमा भ्रष्टाचार खुलेआम हुँदा व्यवस्थापिका बन्धक भएर बस्न नहुने बताएका हुन् । 

‘हिजो मात्र बजारमा आइरहेको छ न्यायालय सम्बन्धी । न्यायालयमा जात्रा चलिरहेको छ, भ्रष्टाचारको अखडा न्यायालय बनेको छ,’ सांसद महतले भने, ‘यस्तो बेला व्यवस्थापिका बन्धक भएर बस्न हुँदैन, अब पनि न्यायालयको बारेमा आवाज उठाउन नसके हामी बन्धक हुन्छौं । यो जात्रा टुलुटुलु हेरेर बस्नु हुँदैन । व्यवस्थापिका टुलुटुलु हेरेर बस्नु हुँदैन ।’